आफुलाई कोरोना संक्रमण भई निको भइसकेकाे कसरी थाहा पाउने ?

काठमाडौं । अहिले नेपालमा कोरोना संक्रमणदर घटिरहेको छ, तर कोरोनाको जोखिम भने टरिसकेको छैन । विज्ञहरु जाडोमा कोरोनाको दाेस्रो लहर आउन सक्ने बताइरहेका छन् ।हामीलाई कुनैपनि लक्षण बिना कोरोना संक्रमण भई निकोपनि भइसकेको हुनसक्छ, लक्षण विहिन हुँदा आफु संक्रमित नभएको भ्रममा पनि हुनसक्छाैं । 

कोरोना भए / नभएको थाहा पाउन पीसीआर परीक्षण भइरहेको छ । पीसीआर परीक्षणले शरीरमा कोरोना भाइरस सक्रिय भएको अवस्थामा मात्र संक्रमण भए / नभएको पत्ता लाग्छ तर पहिला नै संक्रमण भइसकेको तथ्य भने पत्ता लाग्दैन । यसका लागि एन्डीबडी परीक्षण गर्नुपर्ने हुन्छ । 

एन्टीबडी परीक्षणमा रगतको नमुना संकलन गरि जाँच गरिन्छ र यसबाट पहिला नै कोरोना संक्रमण भई निको भइसकेको छ भने पनि पत्ता लाग्छ । नेपालमा पनि कोरोना संक्रमणको वास्तविक अवस्था पत्ता लगाउन एन्टीबडी परीक्षण सेरो प्रिभिलेन्स सर्भे भइसकेको छ, केहि दिनमा नै यसको नतिजा सार्वजनिक गर्ने स्वास्थ्य मन्त्रालयले जनाएको छ । 

ईपिडिमियोलोजि तथा रोग नियन्त्रण महाशाखाका प्रमुख डा.वासुदेव पाण्डेका अनुसार कोरोना संक्रमणको अवस्था पत्ता लगाउन पहिलो चरणमा सेरो प्रिभिलेन्स सर्भे भइसकेको छ। 'हामीले सर्भे सम्पन्न गरि रिर्पोट मन्त्रालयमा बुझाएका छौं, केहि दिनमा मन्त्रालयले सार्वजनिक गर्नेछ ।' डा.पाण्डेले हेल्थपाटीसंग भन्नुभयो ।

सेरो प्रिभिलेन्समा विश्व स्वास्थ्य संगठनबाट मान्यता प्राप्त किटको प्रयोग भएको थियो । नेपालमा किट सजिलै उपलब्ध नहुने भएकाले तत्काल एन्टीबडी परीक्षण गर्न सकिने अवस्था नरहेको पाण्डेले बताउनुभयो । किटहरुको उत्पादन प्रकियामै छ महिना लाग्ने भएकाले सहज तरिकाले किट उपलव्ध भएपछि मात्र नेपालमा एन्टीबडी परीक्षणको थालनी गर्न सकिने डा.पाण्डेकाे भनाई छ । 

रगतको नमुना संकलन गरि कोरोनाको एन्टीबडी परीक्षण मार्फत आफुलाई कोरोना लागेर ठिक भइसकेको वा कोरोना संक्रमणनै नभएको पत्ता लगाउन सर्वसाधारण नागरिकले अझै केही समय कुर्नैपर्ने डा.पाण्डे बताउनुहुन्छ ।