खोप लगाएको १६ दिनपछि ७५ बर्षीय बृद्धलाई कोरोना संक्रमण

काठमाडौं । कोरोना विरुद्धको खोप लगाएको १६ दिनपछि एक वृद्धलाई कोरोना भाइरस संक्रमण पुष्टि भएको छ । काठमाडौंका ७५ वर्षका वृद्धलाई खोप लगाएको एक सातामा नै कोरोनाको लक्षण देखिएको थियो । 

शहीद शुक्रराज ट्रपिकल तथा सरुवा रोग अस्पतालका निर्देशक डा.सागर राजभण्डारीले फागुन ९ गते ती वृद्धलाई संक्रमण पुष्टि भएको जानकारी दिनुभयो । वृद्धकी श्रीमती, छोरा र बुहारीलाई पनि कोरोना संक्रमण भएको छ।

खोप लगाएपछि रोगप्रतिरोध क्षमताको विकास हुन एक महिनासम्म लाग्ने बताउदै उहाँले ती वृद्धमा रोगप्रतिरोध विकास नभइसकेको अवस्थामा नै संक्रमण भएको हुनसक्ने बताउनुभयो । संक्रमण पुष्टि भएका वृद्धलाई निमोनिया भएको र अहिले उपचाररत रहेको निर्देशक राजभण्डारीले जानकारी दिनुभयो । 

उहाँले खोप लगाउने बित्तिकै रोग प्रतिरोध क्षमताको विकास हुन समय लाग्ने भएकाले खोप लगाएपछि पनि जनस्वास्थ्य मापदण्डको उत्तिकै पालना गर्नुपर्ने बताउनुभयो । उहाँले भारतमा संक्रमण बढिरहेको अवस्थामा नेपाल पनि जोखिममा रहेकाले सचेत रहन आग्रह गर्नुभयो ।