काठमाडौंमा पनि भेटिए हैजाका शंकास्पद बिरामी, ललितपुरका थप एक जनामा पुष्टि

काठमाण्डौ उपत्यकामा हैजाका बिरामी बढ्न थालेका छन् । आज, ललितपुरका थप एक जनामा हैजा पुष्टि भएको छ । यसअघि हैजा पुष्टि भएर शुक्रराज ट्रपिकल तथा सरुवा रोग अस्पताल टेकुमा  उपचार गराइरहेका १६ वर्षीय कशोरकी आमालाई पनि हैजा पुष्टि भएको हो ।

ललितपुर महालक्ष्मी नगरपालिका लुभुकी ४५ वर्षीया महिला यही साउन ९ गते टेकु अस्पताल भर्ना भएकी थिइन् । आज आएको उनको कल्चरको रिपोर्टमा हैजा पुष्टि भएको अस्पतालका चिकित्सकले जानकारी दिएका हुन् । 

यस्तै, काठमाण्डौमा पनि हैजाका शंकास्पद बिरामी फेला परेका छन् । काठमाण्डौ महानगरपालिका-२० भीमसेनस्थानकी ३२ वर्षीया महिलामा हैजाको शंका गरिएको छ  ।

आज बिहान टेकु अस्पतालमा भर्ना भएकी महिलाको आरडीटी पोजेटिभ देखिएको अस्पतालले जनाएको छ । नमुना परीक्षणका लागि राष्ट्रिय जनस्वास्थ्य प्रयोगाशालामा पठाइएको डाक्टरले जानकारी दिएका छन् ।

टेकु अस्पतालमा हैजाका अन्य शंकास्पद बिरामीहरुको पनि उपचार भइरहेको छ ।

ललितपुर चापागाउँकी २४ वर्षीया युवती शनिवार बेलुका  अस्पतालमा भर्ना भएकी थिइन् । उनकाे आरडीटी पाेजेटिभ आएकाे छ । उनको आईसीयूमा उपचार भइरहेको अस्पतालले जनाएको छ । यसअघि, हैजा पुष्टि भएका गोदावरी नगरपालिका थैबमा रहेकाे सुधारगृहका थप एक जनाकाे आरडीटी पाेजेटिभ आएकाे छ । यस्तै, हैजा पुष्टि भएका १७ वर्षीय एक किशोरको पनि टेकु अस्पतालमा उपचार भइरहेको छ। 
आरडीटी पोजेटिभ आएका सबैको थप परीक्षण्का लागि राष्ट्रिय जनस्वास्थ्य प्रयोगशालामा पठाइएको चिकित्सकले जानकारी दिएका छन्।