लमजुङमा डाक्टरमाथि वडाअध्यक्षबाट कुटपिट र दुर्व्यवहार

लमजुङमा वडाअध्यक्षले डाक्टरमाथि कुटपिट गरेका छन्। बेशीहर नगरपालिका–७ का वडाअध्यक्ष ऋषिराम बस्नेतले जिल्ला अस्पताल लमजुङमा कार्यरर डाक्टर सन्दीप अधिकारीमाथि कुटपिट गरेको आरोप लागेको छ। 

बस्नेतबाट आफूमाथि कुटपिट भएको भन्दै डाक्टर अधिकारीसहितले जिल्ला प्रहरी कार्यालयमा आज जाहेरी दिनुभएको छ। 

जाहेरीमा उल्लेख भए अनुसार बस्नेतले असोज ७ गते राति साढे १० बजे अस्पतालमा इमर्जेन्सीमै डा.अधिकारीमाथि आक्रमण गर्नुका साथै अन्य स्वास्थ्यकर्मीमाथि दुर्व्यवहार गरेका थिए। 

राति बस्नेतले उपचारका लागि आफन्तलाई लिएर अस्पतालको इमर्जेन्सीमा आएका थिए। 

डा.अधिकारीले बिरामी जाँच गर्दा भर्ना गरेर राख्नुपर्ने अवस्था देखियो। वार्डमा भर्ना गर्नका लागि एक मञ्जुरी नामामा सही गर्न बस्नेतलाई आग्रह गरिएको थियो। तर बस्नेतले मन्जुरी नामाको भाषा चित्त नबुझेको भनी सही गर्न अस्वीकार गरे। 

पछि अर्काे बनाउँदा पनि चित्त नबुझेपछि आफैँले  मन्जुरी नामा बनाएर बस्नेतले सही गरेका थिए। 

यसपछि पनि बस्नेतले चिकित्सक स्वास्थ्यकर्मीसँग विवाद गरिरहेका थिए। विवादकै क्रममा सुरुमा नर्सिङ कक्षमै रहनुभएका डा.अधिकारीलाई बस्नेतले मोबाइलको झटारो हाने। पछि नर्सिङ कक्षभित्रै पसेर टाउको र छातिमा मुक्का प्रहार गरेको आरोप लगाइएको छ।

कुर्सी उठाएर प्रहार गर्न खोज्दा त्यहाँ रहेका अन्य स्वास्थ्यकर्मीले रोकेका थिए। त्यसपछिनर्सिङ कक्षबाट निस्किएर स्ट्याम्प प्याड समेत प्रहार गरेको आरोप छ।

वार्डमा बिरामी भएको ठाउमा गई हो–हल्ला गरी बिरामीलाई त्रसित र आतंकित बनाएको प्रहरीलाई दिइएको जाहेरीमा उल्लेख छ। 

बस्नेतले मदिरा सेवन गरेको आएको र इमर्जेन्सीमा कार्यरत स्वास्थ्यकर्मीलाई आतंकित बनाएको आरोप छ। 

अस्पतालमा डियूटीमा रहेको चिकित्सक र नर्सहरू उपर विभिन्न अश्लील शब्दहरू प्रयोग गरेको हातपात समेत गरेकाले स्वास्थ्यकर्मी तथा

स्वास्थ्य संस्थाको सुरक्षा ऐन २०६६ (संशोधन)अनुसार कारबाहीका लागि माग गरिएको छ।