पश्चिमाञ्चल क्षेत्रीय अस्पतालमा चौथो व्यक्तिको मिर्गौला प्रत्यारोपण 

पोखरा स्वास्थ्य विज्ञान प्रतिष्ठान अन्तर्गत रहेको पश्चिमाञ्चल क्षेत्रिय अस्पतालमा चौथो व्यक्तिको मिर्गौला प्रत्यारोपण भएको छ । 
शहीद धर्मभक्त राष्ट्रिय अंग प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठको नेतृत्वमा असोज ३ गते तनहुँकी ४६ वर्षकी महिलाको मिर्गौला प्रत्यारोपण भएको हो । 

४६ वर्षकी ती महिलालाई उहाँका ५० वर्षका श्रीमानले मिर्गाैला दिनुभएको हो । पोखरामा यसअघि ३ जनाको मिर्गाैला प्रत्यारोपण भइसकेको छ । कार्यकारी निर्देशक श्रेष्ठका अनुसार पोखरामा हालसम्म भएका ४ वटा प्रत्यारोपणमा २ महिला र २ पुरुषले मिर्गाैला दान गरेका छन् । 

नेपालमा हाल भइरहेको प्रत्यारोपणको अनुपात हेर्दा अंग दातामा ८० प्रतिशत महिला छन् । मिर्गाैला फेल हुनेहरुमा महिला र पुरुष उत्तिकै रहेपनि महिलालाई दाता पाउनै गार्हाे पर्ने गरेको डा.श्रेष्ठ बताउनुहुन्छ । ‘पुरुषलाई अंग दिनेमा महिलाहरु अधिक छन् तर महिलालाई अंगदान गर्न हिच्किचाउने गरेको मैले देखेको छु, कति महिलाहरु दाता नपाएर उपचारमै आउदैनन् । उहाँले भन्नुभयो – प्रत्यारोपणमा पनि विभेद देखिएको छ । ’

७ वटै प्रदेशमा मिर्गाैला प्रत्यारोपण विस्तार गर्ने सरकारको कार्यक्रमअनुसार शहीद धर्मभक्त राष्ट्रिय अंग प्रत्यारोपण केन्द्रले कर्णालीको सुर्खेत प्रादेशिक अस्पताल र सुदुरपश्चिमको धनगढीमा मिर्गाैला प्रत्यारोपण सेवा सुरु गर्ने सम्झौता गरिसकेको छ ।  छिट्टै यी स्थानमा पनि मिर्गाैला प्रत्यारोपण सेवा सुरु गर्ने तयारी भइरहेको केन्द्रले जनाएको छ ।