नर्सिङ पढ्दै गरेका छात्रामाथि कुटपिट, होस्टल सञ्चालक पक्राउ

विराटनगरस्थित विराटनगर नर्सिङ क्याम्पसमा अध्ययनरत छात्रामाथि होस्टल सञ्चालकबाट दुर्व्यवहार भएको छ। 

विराटनगर महानगरपालिका–८ मधुधारामा रहेको मुनलाइट गर्ल्स होस्टल सञ्चालक मधु रेग्मीले हिजो होस्टलमा बस्ने ३ छात्रामाथि कुटपिट र दुर्व्यवहार गरेकी हुन् । 

रेग्मीले उनको होस्टलमा बस्दै आएका छात्रालाई कुटपिट गरेको र समान फालिदिएको भिडियो सामाजिक सञ्जालमा देख्न सकिन्छ ।

छात्राहरू बीएसी नर्सिङ पहिलो वर्षमा अध्ययनरत थिए । उनीहरुले फागुन महिनासम्मको भाडा तिरिसकेको बताएका छन् । ३० गते होस्टल छाडेर कलेजको होस्टलमा जाने तयारी भएपछि रेग्मीले थप ३–३ हजार मागेकी थिइन् । अहिले दिन सकिँदैन भनेपछि तत्काल निस्किएर जा भन्दै समान फाल्ने र छात्रालाई लछार–पछार गरेको भिडियोमा समेत देखिन्छ । 

विद्यार्थीले जिल्ला प्रहरी कार्यालय मोरङमा जाहेरी दिएपछि प्रहरीले रेग्मीलाई पक्राउ गरेको छ ।  रेग्मीलाई अभद्र व्यवहारको मुद्दा चलाएर कारबाही प्रक्रिया अगाडि बढाइएको प्रहरीको भनाइ छ।