गुपचुप औषधिको मूल्य बढाउने तयारी : पत्र बाहिरिएपछि महानिर्देशक भट्टराई तनावमा

औषधि व्यवस्था विभागले नेपालमा उत्पादित औषधिको मूल्य बढाउने तयारी गरेको छ । औषधिको मूल्य समायोजनका लागि विभागले  बैठक डाकेको छ।

औषधि व्यवस्था विभागका महानिर्देशक भरत भट्टराईले मंगलबार औषधि व्यवसायी र सम्बन्धित संस्था तथा निकायका अधिकारीहरुलाई बैठकमा उपस्थित हुने पत्राचार गर्नुभएको छ। 

बैठक बिहीबार  दिउँसो १ बजेका लागि विभागको कार्यालय बिजुली बजारमा बैठक डाकिएको छ । बैठकका लागि तीनवटा प्रस्ताव तय गरिएको छ। 

जसमा सरकारले विभिन्न मितिमा विभिन्न प्रकारको औषधिहरुको तोकिएको खुद्रा मूल्यमा समयसापेक्ष परिमार्जन/संशोधनको विषय, मूल्य निर्धारण सम्बन्धी कार्यविधिको विषयमा र मूल्य निर्धारण नभएका औषधिहरुको मूल्य निर्धारण गर्ने विषयमा छलफल गर्ने तय भएको छ । 

समयसापेक्ष औषधिको मूल्य समायोजन गर्नुपर्ने औषधि उत्पादक व्यवसायीले लामो समयदेखि माग राख्दै आएका छन्। उक्त प्रस्तावको फाइल लामो समयदेखि विभागमा अड्किएको गुनासो औषधि उत्पादक व्यवसायीको छ । निरन्तर माग भइरहँदा पनि लामो समयसम्म औषधिको मूल्य समायोजनमा विभागका महानिर्देशक भट्टराईले चासो दिनुभएको थिएन। 

भानुभक्त ढकाल स्वास्थ्यमन्त्री हुँदा विभागको महानिर्देशक नियुक्त हुनुभएका भट्टराईले नयाँ सरकार बनेसँगै आफूलाई असुरक्षित महसुस गर्नुभएको छ । 

औषधि उत्पादक व्यवसायीले मूल्य समायोजनको प्रस्ताव पेश गर्दा पनि लामो समय कुनै मतलब नगर्नुभएका महानिर्देशक भट्टराईले एकाएक किन औषधिको मूल्य बढाउन लाग्नु भयो त ? 

औषधि व्यवस्था विभाग स्रोतका अनुसार अहिलेको सरकारले आफूलाई हटाउने सम्भावना देखेर नै भट्टराई यसमा लाग्नुभएको हो । औषधिको मूल्य बढाएर त्यसले महानिर्देशक भट्टराईलाई फाइदा के गर्छ त?

विभाग स्रोतको दावी छ- उहाँ व्यवसायीको माग सम्बोधन गरी उनीहलाई आफ्नो पक्षमा पार्ने प्रयत्नमा हुनुहुन्छ । अन्य व्यक्तिगत लाभका कुरा पनि यसमा जोडिएका छन् । 

मूल्य समायोजनको माग राख्ने उत्पादकलाई आयतकर्तालाई देखाएर पन्छिने र आयातका लागि सहजीकरणको माग गर्ने आयातकर्ता व्यवसायीलाई उत्पादकलाई देखाएर पन्छिने गरेको आरोप ।

कोभिड महामारीका कारण देशमा औषधि हाहाकार हुँदा पनि व्यवयासीको माग अनुसार मूल्य समायोजन र आयात सहजीकरण गर्न चासो नदेखाएको विभाग स्रोतको आरोप छ । 

अहिले व्यवसायीको माग पूरा गरी उनीहरुलाई आफ्नो हातमा लिन सकिएमा विभागमा रहिरहन सहन हुने बुझाइका साथ यतातिर लागेको स्रोतको दावी छ । 

औषधिको मूल्य बढाउनै पर्ने थियो भने यतिका समय किन रोकियो ? ठिक थिएन भने अहिले किन प्रकिया अघि बढाइयो ?’ विभाग स्रोतको प्रश्न गर्छ ।

गुपचुप रुपमा औषधिको मूल्य बढाउने तयारी गरिरहेका बेला एकएका पत्र बाहिरिएपछि महानिर्देशक भट्टराई तनाव परेको विभाग स्रोत बताउँछ । 

कसरी पत्र बाहिरियो ? भनेर भट्टराईले विभागका कर्मचारीहरुलाई सोधपुछ समेत गर्नुभएको छ ।