यो वर्षको अन्त्यसम्म ४० प्रतिशत जनसंख्याले खोप पाउनुपर्छ : विश्व स्वास्थ्य संगठन
काठमाडौं । विश्व स्वास्थ्य संगठन(डब्ल्यूएचओ)ले कोरोना महामारी अन्त्यका लागि खोप केन्द्रित रणनीति अवलम्वन गर्न विश्वका सबै राष्ट्रलाई आग्रह गर्दै आएको छ । जसअनुसार यस वर्षको अन्त्यसम्ममा विश्वका प्रत्येक राष्ट्रका कम्तिमा ४० प्रतिशत जनसंख्याले कोरोना विरुद्धको खोप पाउनुपर्ने लक्ष्य डब्ल्यूएचओले निर्धारण गरेको छ ।
डब्ल्यूएचओको नियमित प्रेस बिफ्रिङमा प्रमुख डा.अधानोम टेड्रोसले महामारी अन्त्यका लागि खोपको समाच पहुँच हुनपर्नेमा जोड दिनुभयो । उहाँका अनुसार यसवर्षको सेप्टेम्वरसम्म प्रत्येक देशमा कम्तिमा १० प्रतिशत, यो वर्षको अन्त्यसम्म ४० प्रतिशत र सन् २०२२ को मध्यसम्ममा ७० प्रतिशत जनसंख्यालाई खोप लगाउने लक्ष्य डब्ल्यूएचओले राखेको छ ।
यो लक्ष्य पुरा भएपछि मात्रै महामारी अन्त्यको आभाष हुने र यसका लागि सबै राष्ट्र एक हुनपर्ने उहाँले बताउनुभयो । उच्च तथा मध्य आयस्रोत भएका आधाभन्दा धेरै देशहरुले २० प्रतिशत जनसंख्यालाई खोप लगाइसकेको जानकारी उहाँले दिनुभयो ।
जबकी कम आयस्रोत भएका ७९ देशमध्ये ३ वटा देशले मात्रै २० प्रतिशत जनसंख्यालाई खोप लगाउन सफल भएका छन् । जी सेभन तथा अन्य देशहरुले खोप सहयोगको घोषणा गरेकोप्रति डब्ल्यूएचओले कृतज्ञता व्यक्त गरेको छ । कोरोना महामारीको १८ महिना बितिसक्दा पनि जनस्वास्थ्य मापदण्डबारे जनमासलाई वुझाउन नसक्नु, खोपमा समान पहुँच नहुँदा लगातार संक्रमण बढिरहेको निष्कर्ष डब्ल्यूएचओको छ ।
‘देशहरुका प्रत्येक क्षेत्रहरुमा संक्रमित र उनीहरुको मृत्यु बढिरहेको छ, ल्याटिन अमेरिकामा संक्रमण अझ बढि छ । अफ्रिकामा एक प्रतिशतभन्दा कम जनसंख्याले खोप पाएका छन् । आउदो वर्षहरुमा खोप वितरण हुँदा आज मृत्युवरण गरेकाहरुको लागि त्यो निकै नै ढिला भइसकेको हुनेछ, टेड्रोसले भन्नुभयो ।
हालसम्म विश्वमा १७ करोड ७७ लाखभन्दा बढीलाई संक्रमण पुष्टि भएको छ जसमध्ये ३८ लाख ४९ हजार ८६५ जनाको मृत्यु भइसकेको छ भने ११ करोड ५७ लाख ५२ हजारले कोरोना जितेका छन् ।
तपाईँको अभिमत