भारतमा एकैदिन करिब २ लाख कोरोना संक्रमित थपिए, संक्रमित दर विश्वभर बढ्दै

काठमाडौं । भारतमा पछिल्लो २४ घण्टामा करिब २ लाख कोरोना संक्रमित थपिएका छन् । २४ घण्टामा १ लाख ९९ हजार ५ सय ६९ संक्रमित थपिएको भारतको स्वास्थ्य मन्त्रालयले जनाएको छ।  
भारतमा अहिलेसम्म संक्रमितको संख्या १ करोड ४० लाख ७० हजार पुगेको छ। यस्तै पछिल्लो २४ घण्टामा १ हजार ३७ जनाको मृत्यु भएसँगै भारतमा मृत्यु हुनेको संख्या १ लाख ७३ हजार पुगेको छ । 
हिजो मात्रै भारतमा एकैदिन करिब २ लाख मानिसमा कोरोनाको संक्रमण पुष्टि भएको थियो । 
संक्रमण बढेसँगै भारतमा संक्रमितहरूले ज्यान गुमाउने क्रम पनि बढेको छ। १० दिनअघि कोरोनाबाट मृत्यु हुनेको संख्या दैनिक ५ सयभन्दा कम थियो। हिजो १ हजार ३८ जना संक्रमितको मृत्यु भएको छ । 
संक्रमण तीव्र रूपमा फैलिए पनि भारतका विभिन्न राज्यमा सरकारले प्रतिबन्ध लगाएको छैन । उत्तराखण्डको हरिद्वारमा कुम्भ मेला चलिरहेको छ । 
मेलामा सहभागीमध्ये अहिलेसम्म १२ सय ७८ जनामा कोरोना संक्रमण पुष्टि भएको छ । उत्तराखंण्ड र उत्तर प्रदेशका मुख्यमन्त्रीहरूमा पनि अहिले कोरोना संक्रमण भएको छ ।
भारतमा विशेषगरी महाराष्ट्र, कर्नाटका, राजस्थान, बिहार, उत्तर प्रदेश राज्यहरूमा संक्रमण दर निकै तीव्र छ ।
यस्तै,अमेरिकामा ७८ हजार ३ सय, ब्राजिलमा ७६ हजार, टर्कीमा ६२ हजार ७ सय, फ्रान्समा ४३ हजार ५ सय तथा जर्मनीमा ३२ हजार ५ सय जनामा संक्रमण पुष्टि भएसँगै एकै दिन विश्वभर ८ लाखभन्दा बढी संक्रमित थपिएका छन्।