काठमाडौं उपत्यकाका यी स्थानमा भेटियो हैजाका बिरामी

हालसम्म काठमाडौं उपत्यकामा विभिन्न १५ स्थानमा १७ जनामा हैजा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार १७ जनामध्ये ५ जनाको उपचार भइरहेको छ भने १२ जना डिस्चार्ज भएका छन् । असार २ गते बागबजार बस्ने २ जनामा हैजा संक्रमण भएको थियो, त्यसयता १८ दिनको बीचमा विभिन्न स्थानका १७ जनालाई हैजा संक्रमण भएको छ । 

पानीकै कारण हैजा संक्रमण देखिएको छ । केही स्थानका पानीमा दिसामा पाइने जीवाणु मिसिएको पाइएको छ यद्यपी हैजा संक्रमण गराउनेजीवाणु भने फेला नपरेको एक स्वास्थ्य अधिकारीले जानकारी दिनुभएको छ । उहाँका अनुसार संक्रमितले प्रयोग गरेका उपत्यकाका धारा र इनारको पानी, ट्याङकरको पानीमा दिसामा पाइने जीवाणु देखिएकाले पानी प्रदूषित छ जसका कारण झाडापखालाबाट बिरामी भइरहेका छन् तर हालसम्म हैजाका जीवाणु भेटिएको पुष्टि भएको छैन । 

मन्त्रालयका अनुसार बागबजार र कालीमाटी क्षेत्रमा २/२ जना हैजाका बिरामी देखिएका छन् । त्यसैगरी, सानेपा, डिल्लीबजार, कपन, बालाजु बोहोराटार बल्खु, थानकोट, नैकाप, कोटेश्वर, कंलकी (खसीबजार) , कीर्तिपुर, टेकु, कागेश्वरी मनहरा र ग्वार्कोमा १/१ जनामा हैजा देखिएको छ । 
ईपिडिमियोलोजी तथा रोग नियन्त्रण महाशाखा (इडिसिडि)ले हैजा संक्रमित स्रोत पहिचान गर्न टोली खटाएको जनाएको छ ।  विभिन्न स्थानमा नमुना संत्रलन तथा परीक्षण वुुथ स्थापना , गिरानी बढाउने तथा विद्यालय र जोखिममा रहेका समुदायमा सचेतना अभियान सञ्चालन गर्ने तयारी गरिएको इडिसिडिले जनाएको छ । 

उसका अनुसार प्रथम केसको र कार्यस्थलबाट भण्डारण गरिएको धारा, जार र जमिनमुनिको पानीको नमुनामा कोलिफर्म जीवाणु भेटिएको छ भने ललितपुरबाट लिएको १८ वटा पानीको नमुनामा १२ वटा नमुनामा इकाउली जीवाणु भेटिएको छ ।

हैजा वा झाडापखाला लाग्नबाट बच्न पानी उमालेर, फिल्टर गरेर वा एक लिटर पानीमा तीन थोपा तरल क्लोरिन मिसाएर मात्रै पिउन विज्ञहरूले सुझाव छ ।