चिनसँग ४० लाख डोज खोप खरिद सम्झौता, १० लाख डोज यसै साता आउने

काठमाडौं । सरकारले चिनबाट ४० लाख डोज खोप ल्याउने भएको छ । सरकारले चिँनिया कम्पनी सिनोफार्मसँग ४० लाख डोज भेरोसेल खोप खरिदको सम्झौता गरेको छ ।

चिन सरकारको अनुरोधमा खोप खरिद प्रक्रिया तथा मुल्य गोप्य राखि नन् डिस्क्लोजेवल एग्रिमेन्ट (एनडीए) गरिएको स्वास्थ्य मन्त्रालयका एक उच्च अधिकारीले बताउनुभयो । उहाँका अनुसार चिनले धेरै देशहरुमा एनडीए हुनु पर्ने सर्तमा बिक्रि प्रक्रिया अगाडी बढाएकाे र नेपाल पनि त्यसमध्ये एक हाे ।

उहाँ भन्नुहुन्छ, ‘अहिले खोपको मुल्यभन्दा समयमा खोप खरिद गर्न पाउनुनै ठुलाे कुरा हो । कुनै न कुनै दिन त मुल्य थाहा हाेला नि, खोपको हाहाकार मच्चिरहेका बेला खोप आउनु सबैभन्दा महत्वपूर्ण हो । १० लाख डोज खोप यसै साता आउनेछ । अहिले खाेप लगाएर सुरक्षित हुनुहाेस् मुल्यमा शंका लागे हामीलाई कारबाही गर्नुहाेला।’

भारतले खोप निर्यातमा रोक लगाएपछि नेपालले चीनबाट भेरोसेल र अमेरिकाको जोन्सन एण्ड जोन्सन खोप खरीद गर्ने प्रक्रिया अघि बढाएको थियो । यस्तै बेलायत, रुस, युरोपियन युनियन, कोभ्याक्स सुविधाबाट पनि खोप ल्याउने पहल थालिएको जनाएको थियो ।