काठमाडौं उपत्यकासहित ठुला अस्पताल भएका नगरमा ५ दिनभित्र खोप दिइसक्ने

काठमाडौं । नेपालमा पनि कोरोना विरुद्धको खोप अभियान भोलिबाट सुरु हुदैछ । देशभर ६२ वटा  अस्पताल र १२० वटा खोप केन्द्रबाट एकैसाथ सुरु गरिने खोप अभियानमा ४ लाख ३० हजार जनालाई खोप दिइने लक्ष्य छ । 

उक्त खोप अभियान एक हप्ताभित्र सम्पन्न गर्ने योजना छ जसमा ठुला अस्पताल भएका उपत्यका, महानगर, उपमहानगरपालकिामा भने ३ देखि ५ दिनभित्र यो खोप कार्यक्रम सम्पन्न गर्ने लक्ष्य राखिएको स्वास्थ्य तथा जनसंख्या मन्त्रालयले जनाएको छ । 

यस अभियानमा भारतले अनुदानमा दिएको खोप कोभिशिल्ड दिइनेछ । मन्त्रालयका अनुसार पहिलो चरणमा स्वास्थ्यकर्मी, शव व्यवस्थापक, स्वयंम सेविका, एम्बुलेन्स तथा शव वहान चालक, कैदी र सरसफाई कार्यमा संलग्न व्यक्तिहरुलाई खोप दिइनेछ । यो खोप

दुई पटक लगाउनुपर्नेछ । पहिलो मात्रा लगाएको ४ हप्तापछि दोस्रो मात्रा लगाउनपर्ने मन्त्रालयले जनाएको छ । 

काठमाडौं उपत्यकामा भने ११ वटा प्रमुख अस्पतालबाट खोप लगाइनेछ । उपत्यकाबाट खोप दिइने ११ अस्पतालहरु :

१. शुक्रराज ट्रपिकल तथा सरुवा रोग अस्पताल
२. वीर अस्पताल
३. आयुर्वेद अनुसन्धान तथा तालिम केन्द्र अस्पताल, कीर्तिपुर
४. पाटन अस्पताल
५. परोपकार प्रसुती तथा स्त्री रोग अस्पताल
६. त्रिवि शिक्षण अस्पताल महाराजगञ्ज
७. भक्तपुर अस्पताल
८. शहिद धर्मभक्त अंग प्रत्यारोपण केन्द्र
९. काठमाडौं मेडिकल कलेज, जोरपाटी
१०. सशस्त्र प्रहरी बलम्बु अस्पताल
११. शहिद गंगालाल अस्पताल