औषधिको मूल्यसम्बन्धी आएका समाचारप्रति औषधि व्यवस्था विभागको 'घोर आपत्ति'

हालै विभिन्न अनलाइन र सामाजिक सञ्जालमार्फत औषधिको मूल्य वृद्धिसम्बन्धी समाचारहरू प्रसारित भएकाप्रति औषधि व्यवस्था विभागले आपत्ति जनाएको छ । बिहीबार विज्ञप्ति जारी गर्दै उसले समाचारहरू गलत, भ्रामक र तथ्यहीन भएको बताउँदै नागरिकलाई भ्रममा नपर्न आग्रह गरेको छ।

'२०८१ साल असार २६ मा नेपाल सरकारद्वारा स्वीकृत औषधिको मूल्य निर्धारण सम्बन्धी समिति गठन गरिएको थियो', विभागले भनेको छ, 'सो समितिले १७५ प्रकारका औषधिको अधिकतम खुद्रा मूल्य निर्धारण गरेको छ। विभागका अनुसार नेपाल सरकारले निर्धारण गरेको मूल्यअनुसार औषधिको मूल्य हालसम्म स्थिर रहेको र कुनै पनि औषधिको मूल्य वृद्धि गरिएको छैन।'

त्यस्तै सत्यतथ्य नबुझी एकतर्फी समाचार तयार पारी 'मिडिया ट्रायल' गरिएको विभागको आरोप छ । 'मिडिया ट्रायलका रूपमा प्रसारण गरिएका खेदजनक समाचारप्रति विभागको गम्भीर असहमति रहेको छ', उसले भनेको छ, 'एकतर्फी रूपमा प्रसारण गरिएका समाचारप्रति विभाग घोर भर्त्सना गर्दछ ।'

विभागका अनुसार औषधिको मूल्य निर्धारण गर्दा औसत, मध्यम तथा सन्दर्भ मूल्य जस्ता मापदण्डहरूका आधारमा मूल्य तोकिने गर्दछ। साथै, औषधिको मूल्य संशोधन गर्दा बजार मूल्य, आयात लागत, र अन्तर्राष्ट्रिय मूल्य तुलनालाई समेत विचार गरिन्छ।