राष्ट्रिय जनस्वास्थ्य प्रयोगशालामा १०० भन्दा बढी थप परीक्षणको तयारी(भिडियो)

राष्ट्रिय जनस्वास्थ्य प्रयोगशालामा १०० भन्दा बढी थप नयाँ परीक्षण हुने भएको छ । 
प्रयोगशालामा नसर्ने रोग सम्बन्धी थप नयाँ परीक्षणको तयारी भइरहेको निर्देशक डा.रञ्जनराज भट्टले जानकारी दिनुभयो । 

थपिन लागेको परीक्षण सहुलlयतमा गर्नेगरL योजना बनाइएको उहाँले बताउनुभयो । 

प्रधानमन्त्रीका जनस्वास्थ्य विज्ञ सल्लाहाकार दिपेन्द्र खड्काका अनुसार जनस्वास्थ्य प्रयोगशालाबाट थप नयाँ परीक्षण एवं सो परीक्षण वापत लाग्ने शुल्क प्रस्ताव गरिएको र सो प्रस्तावअनुसार प्रक्रिया अगाडि बढाइएको छ । 

देशभरका अस्पतालमा हुने प्रयोगशाला परीक्षण दस्तुरमा एकरुपता ल्याउने तयारी बमोजिम थप नयाँ परीक्षणको सेवा विस्तार गर्न लागेको खड्काले जानकारी दिनुभयो। प्रधानमन्त्री पुष्पकमल दहाल प्रचण्डले आफ्ने एक वर्षे कार्यकालको समीक्षामा देशभरका अस्पतालहरुमा हुने प्रयोगशाला परीक्षण दस्तुरमा एकरुपता ल्याउने बताउनुभएको थियो ।

अहिले एसआरएल, सम्यक, रिलायन्स र लाल प्याथले नेपालमा नहुने परीक्षण विदेशमा नमुना पठाएर जाँच गरिँदै आएको छ। अब विदेशमा भइरहेका धेरै प्रयोगशाला परीक्षण नेपालमै  सुरु गर्न लागेको विज्ञ सल्लहाकार खड्काले जानकारी दिनुभयो।

जनस्वास्थ्य प्रयोगशालाले गरेको प्रस्तावित नयाँ थप प्रयोगशाला परीक्षण दस्तुरमा हाल बाहिर भइरहेको शुल्कमा ९० प्रतिशतसम्म घटाइएको छ । १० हजार शुल्कमा भइरहेको जेल कार्ड पीएनएच परीक्षण जनस्वास्थ्य प्रयोगशालामा १ हजारमा गर्नेगरी प्रस्ताव गरिएको छ । 

जेल कार्ड पीएनएच परीक्षण भनेको रगतको जाँच हो, जुन पिसाबबाट हेमोग्लोबिन चुहिने रोगको अवस्था बुझ्न गरिन्छ । थपिन लागेको परीक्षणमा बायोप्सी र जिनसिक्वन्सिङ पनि रहेको छ । 

यसैगरी रगतको क्यान्सरको परीक्षण (फ्लोसाइटोमेट्री मार्कर एन्टीबडी) पनि जनस्वास्थ्य प्रयोगशालामै हुने भएको छ । यसको परीक्षण शुल्क दस्तुर १० हजार रुपैंया प्रस्ताव गरिएको छ, जबकी हाल लाल प्याथले यस परीक्षणको शुल्क २४ हजार लिने गरेको छ । 

हाल क्यान्सर सम्बन्धि मात्रै ८० भन्दा बढी परीक्षणको नतिजाका लागि विदेशमा नमूना  पठाउनपर्ने बाध्यता छ ।  

रगत जमेको दोष पत्ता लगाउने परीक्षण( प्रोटिन एस) ५ हजारमा गर्ने गरी तयारी भएको छ, हाल लाल प्याथले ८ हजार लिएर यसको परीक्षण गरिरहेको छ । 

कप्पा लाइट चेन र लाम्दा लाइट चेन (रगतको एक किसिमको रोग)को परीक्षण पनि जनस्वास्थ्य प्रयोगशालामै हुने भएको छ । हाल यी दुवै टेस्ट गर्नुपरे नमुना विदेश पठाउनुपर्ने बाध्यता छ । यसको शुल्क कम्तिमा ५२०० तिर्नु परिरहेको छ तर अब जनस्वास्थ्य प्रयोगशालामा ७५० रुपैयाँमै हुने तयारी छ । 
थालेसेमियाको परीक्षण २ हजारमै गर्ने तयारी जनस्वास्थ्य प्रयोगशालाले गरेको छ । हाल यो परीक्षण बाहिर गर्दा ११ हजारभन्दा बढी  लाग्ने गर्छ।

थालेसेमिया वंशाणुगत रोग हो, यो रोग शरीरमा रक्तकोष राम्रोसँग विकास हुन नसक्दा देखापर्छ । जसले हेमोग्लोबिन उत्पादनमा समस्या ल्याउँछ। शरीरमा रगत नबन्ने भएकाले नियमित रगत दिएर यसको उपचार गरिन्छ।

यसका साथै डोनर मिसम्याच(एचएलए) टेस्ट पनि ५ हजारमा जनस्वास्थ्य प्रयोगशालामै गर्ने गरि तयारी गरिएको छ ।