वीर अस्पतालमा १०३ वर्षीया वृद्धाको सफल मस्तिष्क शल्यक्रिया, न्यूरोसर्जरीमा दुर्लभ सफलता

वीर अस्पतालले १०३ वर्षीया वृद्ध महिलाको सफल मस्तिष्क शल्यक्रिया गरी चिकित्सा क्षेत्रमा दुर्लभ उपलब्धि हासिल गरेको छ। कोटेश्वर निवासी वृद्धालाई आपतकालीन अवस्थामा वीर अस्पताल ल्याइएपछि जटिल न्यूरोसर्जिकल शल्यक्रिया गरिएको हो।

लामो समयदेखि अचेत अवस्थामा रहनुभएकी उहाँलाई चार दिनअघि अस्पताल ल्याइएको थियो ।

अस्पतालका अनुसार ती वृद्धा केही समयदेखि पटक–पटक लड्ने र चेतनास्तर घट्ने समस्याबाट पीडित हुनुहुन्थ्यो । सुरुमा परिवारले सामान्य कमजोरी र उमेरकै असर ठाने पनि अवस्था गम्भीर बन्दै गएपछि अन्य अस्पताल हुँदै अन्ततः वीर अस्पताल ल्याइएको थियो।

विस्तृत जाँचपछि उहाँको मस्तिष्कमा ठूलो मात्रामा रक्तस्राव भएको पत्ता लाग्यो। अत्यन्तै उच्च उमेरका कारण मस्तिष्क शल्यक्रिया गर्नु चिकित्सकीय र नैतिक दुवै दृष्टिले ठूलो चुनौती मानिएको अस्पतालले जनाएको छ।

न्यूरोसर्जरी विभागको टोलीले बिरामीका परिवारसँग विस्तृत छलफल तथा परामर्शपछि सामूहिक निर्णय गर्दै शल्यक्रिया गर्ने निर्णय गरेको थियो। शल्यक्रिया सफलतापूर्वक सम्पन्न भएको र हाल बिरामी होसमा फर्किएको, बोल्न सक्ने अवस्थामा रहेको तथा आफैं खाना खान सक्ने अवस्थामा पुगेको अस्पतालले जानकारी दिएको छ।

उक्त शल्यक्रिया प्रा. डा. राजीव झाको नेतृत्वमा डा. समीर आर्याल, डा. नम्रता खड्का, डा. आयुष विमली, नर्स सिन्दु गौतम तथा अन्य स्वास्थ्यकर्मीहरूको टोलीले सम्पन्न गरेको हो।

अस्पतालका अनुसार १०० वर्षभन्दा बढी उमेरका व्यक्तिमा सफल मस्तिष्क शल्यक्रिया विश्वमै अत्यन्त दुर्लभ मानिन्छ र यस्ता घटनाहरू निकै सीमित मात्रामा अभिलेखमा छन्। वीर अस्पतालको न्यूरोसर्जरी विभागले यस सफलताले उमेरको सीमा नहेरी समर्पित सेवा, सहकार्य र सूक्ष्म निर्णय प्रक्रियाबाट जटिल उपचार सम्भव हुने सन्देश दिएको जनाएको छ।