केयू र धुलिखेल अस्पतालबीचको समस्या समाधान गर्न समिति गठन

काठमाडौं विश्वविद्यालय केयू र धुलिखेल अस्पतालबीचको आपसी समस्या समाधानसहितको प्रस्ताव तयार गर्न ७ सदस्यिय समिति गठन भएको छ ।
प्रधानमन्त्री तथा विश्वविद्यालयका कुलपति केपी शर्मा ओलीको अध्यक्षतामा बसेको काठमाडौँ विश्वविद्यालयको ९८ औँ सभाको बैठकले दुई निकायबीच लामो समयदेखि चलिरहेको विवाद समाधान गर्न राष्ट्रिय योजना आयोगकी सदस्य गीता पौड्याल अधिकारीको संयोजकत्वमा सात सदस्यीय समिति गठन गरेको हो ।

समितिमा विश्वविद्यालय र अस्पतालका तीनरतीनजना सदस्य तोकिएको छ । समितिमा विश्वविद्यालयका तर्फबाट उपकुलपति प्राडा. भोला थापा, कानुन संकायका डीन प्राडा.ऋणिकेश वाग्ले र मेडिकल संकायका डिन प्राडा. मनोज हुमागाईं सदस्य हुनुन्छ । 

त्यस्तै अस्पतालका तर्फबाट विश्वविद्यालयका पूर्वउपकुलपति प्राडा. रामकृष्ण मकाजु र डाक्टरहरू डा. विराज कर्माचार्य र डा. राजीव श्रेष्ठ रहनु भएको छ । 

बैठकले थप गृहकार्य र सम्बन्धित पक्षसँग संवाद गरी आगामी माघ ४ गते बस्ने सिनेट बैठकमा विधिवत् प्रतिवेदन पेस गर्न समितिलाई अख्तियारी दिएको छ ।

२०५९ चैत १९ गतेको आपसी सम्झौताका आधारमा सहकार्यमा रहेका ती संस्थाबीच बेमेल देखिएपछि गत साउन ३० गतेको ९७ औँ सभामा कुलपतिका एवं प्रधानमन्त्री ओलीले आपसी संवादबाट समाधान खोज्न गर्नुभएको प्रस्ताव पारित भएको थियो ।

आर्थिक र कर्मचारी नियमावलीसँग बाझिने गरी विश्वविद्यालयले एकपक्षीयरुपमा निर्णयहरु गरेको भन्दै अस्पतालले असन्तुष्टि जनाएपछि विवाद उत्पन्न भएको थियो ।

यसैबीच, विश्वविद्यालयको पछिल्लो दीक्षान्तको ग्रेस लिष्टमा अनुत्तिर्ण सात विद्यार्थीको नाम समावेश भएको पाइएकाले आजको बैठकले ग्रेस लिष्ट सच्याइउने निर्णय गरेको छ । विश्वविद्यालयका रजिष्ट्रार डा अच्युतप्रसाद वाग्लेले ती विद्यार्थीको नाम कसरी सूचीमा पर्न गयो भन्नेबारेमा छानबिन सुरु भएको र ती विद्यार्थीले प्रमाणपत्र नलिएको बैठकलाई जानकारी गराउनुभएको थियो ।