नक्कली डाक्टरको हचुवा एनएमसी नम्बर ९८६०, थरीथरीका प्रमाण पत्र
हेल्थपाटी - माघ ०८, २०८० १७:०४ मा प्रकाशित
अ +
अ -
नक्कली प्रमाण पत्रका आधारमा लामो समयदेखि बिरामीको उपचार गर्दै आएका एक जना पक्राउ परेका छन् । यसरी पक्राउ पर्नेमा मोरङको विराटनगर महानगरपालिका–२ घर भएका सम्बुद्ध भट्टचार्य छन् ।
आचार्यलाई उपत्यका अपराध अनुसन्धान कार्यलयले आज बसुन्धारास्थित धौलागिरी हिमाल पोलिक्लिनिक पक्राउ गरेको हो ।
उनले यससँगै नक्सालस्थित वि केयर पोलिक्लिनिकमा बिरामीको उपचार गर्दै आएको पाइएको प्रहरीको भनाइ छ ।
नक्कली डाक्टर बनेका भट्टचार्यबारे जानकारी दिनु प्रहरीले आज पत्रकार सम्मेलन गरेको थियो । उनले थाइराइडको डाक्टर भन्दै बिरामीको जाँच गर्दै आएको पाइएको छ ।
बिरामी जाँच गरेको शुल्क धौलागिरी हिमाल पोलिक्लिनिकमा ५०० र वि केयर पोलिक्लिनिकमा ७५० लिने गरेको भट्टचार्यले बताएको प्रहरीको भनाइ ।
उनको साथमा थुप्रै नक्कली प्रमाण पत्र र प्रसंशा पत्र प्रहरीले फेला पारेको छ ।
प्रहरीले दिएको जानकारी अनुसार उनले आफू त्रिवि शिक्षण अस्पतालमा काम गर्ने बताउँदै आएका थिए । उनको साथबाट शिक्षण अस्पतालका नक्कली परिचय पत्र समेत फेला परेको छ ।
शिक्षा, विज्ञान तथा प्रविधि मन्त्रालय, त्रिभुवन विश्वविद्यालय र विश्व स्वास्थ्य संगठनको संयुक्त प्रसंशा पत्र पनि उनले नक्कली बनाएको खुलेको छ।
७ वटा स्ट्याम्प र ४ वटा परिचय पत्र प्रहरीले बरामद गरेको छ।
चिकित्सक संघको आजीवन सदस्यता कार्ड एउटा, त्रिवि शिक्षण अस्पतालको परिचय पत्र दुई वटा र नेपाल मेडिकल काउन्सिलको एक वटा परिचय पत्र भेटिएको प्रहरीले जानकारी दिएका छन् ।
बरामद भएका स्ट्याम्पमा उनले प्रमाण पत्रहरुमा नेपाल मेडिकल काउन्सिलको दर्ता नम्बर भनेर ९८६० राखेको पाइएको छ । तर उक्त नम्बर अर्कै डाक्टरको रहेको पाइएको छ ।
यसबाहेक इन्डोक्राइन सोसाइटीको प्रसंशा पत्र, मेडिसिटी अस्पतालको प्रसंशा पत्र, स्कुल अफ बोस्टन युनिभर्सिटीको पोस्ट ग्राजुएट एक्सेलेन्स प्रोग्राम इन कार्डियाक इमर्जेन्सीको नक्कली प्रमाण पत्र पनि फेला परेको छ ।
अमेरिकन हर्ट एसोसिएनसबाट सञ्चालित कार्यक्रम इसीजी, इको, कार्डियोग्राफी तालिमका सहभागी भएको प्रमाणपत्र प्रहरीले बरामद गरेको छ ।
विदेश जाने व्यक्तिको स्वास्थ्य परीक्षणमा प्रमाणिकरण गरेको २ वटा कागजात फेला परेको छ ।
बिरामीको जाँचमा प्रयोग गर्ने उपकरण, ल्यापटप समेत प्रहरीले बरामद गरेको छ ।
भट्टचार्यविरुद्ध इलाज सम्बन्धी कसुर र लिखितसम्बन्धी कसुरमा अनुसन्धान गरी कारबाही अगाडि बढाउने प्रहरीले जानकारी दिएका छन्।
तपाईँको अभिमत