स्वास्थ्यका ३ अध्यादेश निष्क्रिय, महामारी नियन्त्रणमा धक्का

संसदबाट समयानै अध्यादेश पास हुन नसकेपछि स्वास्थ्यका ३ वटा महत्वपुर्ण अध्यादेश निष्क्रिय भएका छन् । अध्यादेश निष्क्रिय भएसँगै कोरोना महामारी नियन्त्रणमा समेत धक्का पुग्ने देखिएको छ । 

संविधान अनुसार ३ साउनमा बसेको संसदको बैठकमा टेवल भएका अध्यादेशहरु ६० दिन भित्र अर्थात बुधबार राती १२ बजे भित्र पास हुनुपर्दथ्यो । तर यो अवधीमा कुनै पनि अध्यादेश पास हुन सकेनन् ।

केपी शर्मा ओली नेतृत्वको सरकारले स्वास्थ्य सम्बन्धी तीनवटा अध्यादेश ल्याएको थियो । कोभिड - १९ संकट व्यवस्थापन अध्यादेश, औषधि (तेस्रो संशोेधन)अध्यादेश, स्वास्थ्यकर्मी तथा स्वास्थ्य संस्थाको सुरक्षा सम्बन्धी (पहिलो संशोधन) अध्यादेश थियो ।

सरकारले गत ७ जेठमा कोभिड - १९ संकट व्यवस्थापन सम्बन्धमा व्यवस्था बनेको अध्यादेश जारी गरेको थियो । सो अध्यादेशबाटै वीर अस्पताललाई कोभिड - १९ युनिफाइड केन्द्रीय अस्पतालमा परिणत गरेको थियो । सोही अध्यादेशले अस्पतालमा ११ औँ तहको व्यक्तिलाई प्रमुख प्रशासकीयक अधिकारी नियुक्ती गर्ने प्रावधान गरेको थियो ।

सो अस्पतालले वीरको मात्रै नभई देशभरको अस्पतालहरुको कोभिड उपचारका लागि आवश्यक समन्वय गर्ने दायित्व पाएको थियो । तर अध्यादेश निष्क्रिय भएपछि उपचार व्यवस्थापनमासमेत समस्या हुने भएको छ । 

यस्तै तत्कालिन सरकारले औषधि (तेस्रो संसोधन)अध्यादेश ल्याएको थियो । सोही अनुसार धेरै नयाँ कोभिड खोपहरु आपतकालीन प्रयोगका लागि अनुमति पाएका थिए । अध्यादेश निष्क्रिय हुँदा यी खोपहरुको प्रयोगमा समेत अन्यौल भएको छ । 

यस्तै स्वास्थ्यकर्मी तथा स्वास्थ्य संस्थाको सुरक्षा सम्बन्धी (पहिलो संशोधन) अध्यादेश पनि बुधबारबाट निष्क्रिय भएको छ । चिकित्सक तथा स्वास्थ्यकर्मीहरुले लामो समय देखिको माग सम्बाेधन गर्ने क्रममा सरकारले यो अध्यादेश ल्याएको थियो । 

निष्क्रिय भएका अध्यादेशहरू यी हुन्–

स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन अध्यादेश २०७८

नेपाल नागरिकता (पहिलो संशोधन) अध्यादेश २०७८

शपथसम्बन्धी अध्यादेश २०७८

कोभिड–१९ सङ्कट व्यवस्थापन अध्यादेश, २०७८

रेल्वे अध्यादेश, २०७८

यौन हिंसाविरुद्धका केही ऐनलाई संशोधन गर्ने अध्यादेश २०७८

फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेश २०७८

संवैधानिक परिषद काम, कर्तव्य, अधिकार र कार्यविधिसम्बन्धी (पहिलो संशोधन) अध्यादेश २०७८

औषधि (तेस्रो संशोधन) अध्यादेश २०७८

सामाजिक सुरक्षा (पहिलो संशोधन) अध्यादेश २०७८

नेपाल प्रहरी र प्रदेश प्रहरी (कार्य सञ्चालन, सुपरीवेक्षण र समन्वय, पहिलो संशोधन) अध्यादेश २०७८

तेजाब तथा अन्य घातक रासायनिक पदार्थ (नियमन) अध्यादेश २०७८