डाक्टरको पछि नलाग्न औषधि उत्पादकलाई सुझाव
फाइल फोटो।
हेल्थपाटी - मंसिर २७, २०७९ ०७:५३ मा प्रकाशित
अ +
अ -
वरिष्ठ मुटु रोग विशेषज्ञ डा. भगवान कोइरालाले औषधि उत्पादकलाई डाक्टरहरूको पछि नलाग्न आग्रह गर्नुभएको छ । अत्यावश्यक औषधि उत्पादनमा स्वदेशी उद्योगः दायित्व, चुनौती, प्रवद्र्धन र आत्मनिर्भरता विषयक संवाद कार्यक्रममा डा.कोइरालाले यस्तो बताउनुभएको हो ।
युएसएआइडीको सहयोगमा औषधि व्यवस्था विभागले सोमबार नीति संवाद कार्यक्रम आयोजना गरेको थियो ।
कार्यक्रममा औषधि उत्पादक कम्पनीहरूका प्रतिनिधिले औषधिको मूल्य बढाउन नपाउँदा उद्योगहरू धरासायी बन्दै गएको गुसानो गरेका थिए ।
नेपाल मेडिकल काउन्सिलका अध्यक्ष समेत रहनुभएका डा.कोइरालाले डाक्टरहरूको पछि लाग्नुको सट्टा गुणस्तरमा ध्यान दिन आग्रह गर्नुभयो ।
‘तपाईहरू डाक्टरको पछि लाग्न छाड्नुस्, गुणस्तरीय औषधि उत्पादन गरेर डाक्टरहरूलाई नै आफ्नो पछि लाग्ने बनाउनुहोस्’ डा.कोइरालाले भन्नुभयो, ‘यति भनेपछि कुरो बुझ्नु भो होला।’
आफ्ना कम्पनीको औषधि बिरामीलाई सिफारिस गरिदिन भन्दै उद्योगीहरूले डाक्टरलाई कमिसन दिने प्रचलनबारे डा.कोइरालाले इंगित गर्नुभएको थियो ।
डाक्टरलाई गर्ने खर्च गुणस्तर वृद्धिमा लगानी गरे राम्रो प्रतिफल आउने डा.कोइरालाको भनाइ छ ।
‘डाक्टरको पछि लाग्दा औषधिको गुणस्तरमा कम्प्रोमाइज गर्नुपर्छ’ डा.कोइरालाले भन्नुभयो, ‘यो तरिकाले कम गुणस्तरीयले बजार पाइरहेका हुन्छन्, गुणस्तरीय उत्पादन ओझेलमा पर्छ ।’
सबै कम्पनीले उस्तै औषधि उत्पादन गर्ने भन्दा पनि फरक–फरक औषधि उत्पादन गर्नसके राम्रो हुने सुझाव उहाँले दिनुभयो ।
तपाईँको अभिमत