'गुणस्तर बनाउनुको मतलब निषेध गर्ने होर ?, विद्यार्थीलाई पढ्नबाट वञ्चित गर्न पाइदैन'

सीटीईभीटी र चिकित्सा शिक्षा आयोगको द्वन्द्वले हजारौं विद्यार्थीको भविष्य अन्यौलमा परेको छ । चिकित्सा शिक्षा आयोगले सीटीईभीटीलाई नवीकरण र सिट निर्धारण नभएका संस्थाको भर्ना प्रक्रिया रद्द गर्न भनेपछि स्वास्थ्य शिक्षासहित इन्जिनियरिङ, कृषि र होटल व्यवस्थापन विषय अध्ययनका लागि आवेदन दिएका विद्यार्थीले परीक्षा दिन पाएका छैनन् । सीटीईभीटीले नियमसंगत भर्ना प्रक्रिया अघि बढाएको दाबी गर्दै आएको छ । तर आयोगले सीटीईभीटीको निर्णय नमान्ने बताएको छ । 

यसरी दुई सरकारी नियामक निकायको विवादले विद्यार्थीहरूको भविष्य अन्यौलमा परेको छ । विद्यार्थीहरू विदेश पढ्न जान बाध्य भएका छन् । चिकित्सा शिक्षाको क्षेत्रमा राज्यको लगानी अभिवृद्धि गर्दै चिकित्सा शिक्षालाई नेपालको राष्ट्रिय आवश्यकता अनुरुप विकास गर्न २०७५ सालमा राष्ट्रिय चिकित्सा शिक्षा ऐन आयो ।

सबै विद्यार्थीहरूको समान पहुँच सुनिश्चित गर्न चिकित्सा शिक्षा आयोगको स्थापना भएको हो । आयोगले ऐनमा भएको प्रावधान अनुसार कार्यान्वयन गर्दा प्राविधिक शिक्षा तथा व्यवसायिक तालिम परिषद् (सीटीईभीटी) अन्तर्गत सञ्चालनमा रहेका २२८ वटा शिक्षण संस्था बन्द भएका छन्।

सीटीईभीटीका अनुसार चिकित्सा शिक्षा ऐनकै कारण २०७७, ०७८ मा कोशीमा ४, मधेसमा ६, वागमतीमा ३५, गण्डकीमा ४, लुम्बिनीमा १७, सुदूरपश्चिममा ६ र कर्णाली प्रदेशमा एक गरी पीसीएल तहको नर्सिङ अध्ययन अध्यापन गराउने ७३ वटा कलेज बन्द भएका छन् ।

नेपालमा ४२९ वटा निजी कलेजले सीटीईभीटीको सम्बन्धन लिएर स्वास्थ्यका प्राविधिक विषय पढाइरहेका थिए । चिकित्सा शिक्षा ऐन आएपछि २२ वर्षअघिदेखि चलिरहेका नर्सिङ क्याम्पसहरू बन्द भएका छन् ।

निषेध गरेर चिकित्सा शिक्षाको क्षेत्रमा राज्यको लगानी अभिवृद्धि कसरी हुन्छ भन्ने प्रश्न पनि आउन थालेको छ । सबै विद्यार्थीहरूको समान पहुँच सुनिश्चित गर्न चिकित्सा शिक्षा आयोगको स्थापना भएपनि भइरहेका कलेजहरू बन्द गराएर विद्यार्थीहरूको समान पहुँच सुनिश्चित कसरी होला भन्ने आवाज पनि उठिरहेको छ । यही विषय उठान गर्दै शिक्षण संस्थाका सञ्चालक, शिक्षक, विद्यार्थी, अभिभावक आन्दोलित भएका छन् । 

आज हामी हेल्थपाटी विशेषको नीति संवाद श्रृङ्खलामा दुई सरकारी नियामक निकाय आ-आफ्नो अडानमा बसेर विद्यार्थीमा पर्न गएको असरप्रति केन्द्रित छौँ ।  यसका लागि जगन्नाथ ढकालले सीटीईभीटीका उपाध्यक्ष खगेन्द्रप्रसाद अधिकारीसँग संवाद गर्नुभएको छ । 
 

विस्तृत भिडियोमा :