थापाको उपचारलाई ५२ लाख संकलन, प्रसाईँको आवश्यक छैन : रविन्द्र मिश्र
हेल्थपाटी - जेष्ठ १५, २०७८ १३:२६ मा प्रकाशित
अ +
अ -
काठमाडौं । विवेकशील साझा पार्टीका नेता उज्वल थापाको उपचारमा बी एन्ड सी मेडिकल कलेजका सञ्चालक दुर्गा प्रसाईँको सहयोग नलिने सो पार्टीका अध्यक्ष रविन्द्र मिश्रले बताउनुभएकाे छ । उहाँले सामाजिक सञ्जाल फेसबुक मार्फत् नेता थापाको उपचारमा प्रसाईँको सहयोग नलिने बताउनुभएकाे हाे ।
‘सहयोग संकलनको क्रममा उज्वल थापाको उपचार खर्च आफूले व्यहोर्ने भनी श्री दुर्गा प्रसाईँले भन्नुभएको भन्ने सञ्चार माध्यममा प्रकाशन/प्रशारण भएको खबर हाम्रो जानकारीमा आएको छ’, उहाँले लेख्नुभएकाे छ, ‘हाल उज्वल थापको परिवार, आफन्तजन, साथी तथा शुभेच्छुकहरूबाट प्राप्त सहयोगले नै स्वास्थ्य उपचारको खर्च व्यहोरिरहेको र भविष्यमा पनि त्यसै गर्ने भएकाले श्री दुर्गा प्रसाईँलाई सद्भावको लागि धन्यवाद ज्ञापन गर्दै उहाँले दिने भनेको सहयोग आवश्यक नपर्ने व्यहोरा जानकारी गराउँदछौँ ।’
मिश्रका अनुसार हालसम्म नेता थापाको उपचारका लागि ५२ लाख बढी रकम संकलन भइसकेको छ । सहयोगका लागि मिश्रले परिवार आफन्त र शुभेच्छुकका तर्फबाट धन्यवाद दिनुभएको छ ।
प्रसाईँले मेडिसिटीमा उपचाररत नेता थापाको उपचारमा लाग्ने सम्पूर्ण खर्च आफूले सहयोग गर्ने विज्ञप्ति मार्फत् बताउनुभएको थियो ।
थापालाई दुई सताअघि कोरोना संक्रमण भएको थियो ।
तपाईँको अभिमत