दुवै मात्रा खोप लगाएकालाई ‘डेल्टा भेरियन्ट’ संक्रमण

नयाँ दिल्ली । ‘डेल्टा भेरियन्ट’ (बी १.६१७.२) का कारण कोरोनाविरुद्धको दुवै मात्रा खोप लगाएका व्यक्तिमा पनि संक्रमण भएको एक अध्ययनले देखाएको छ ।

भारतको अखिल भारतीय आर्युविज्ञान संस्थान (एम्स) ले गरेको अध्ययनअनुसार खोप लगाएका व्यक्तिमा पनि कोरोना संक्रमण हुनुमा डेल्टा भेरियन्टको भूमिका रहेको देखाएको हो । भारतमा खोप लगाएका व्यक्तिमा पनि कोरोना संक्रमण तीव्र बनेपछि संस्थानले गरेको अध्ययनमा कोभिसिल्ड र कोभ्याक्सिन लगाएका अधिकांशमा डेल्टा भेरियन्ट भेटिएको हो ।

कोभिसिल्ड खोप अक्स्फोर्ड–अस्ट्राजेनेकाले विकास गरेको र भारतमा उत्पादित हो भने कोभ्याक्सिन भारतमै विकसित खोप हो ।यी खोप लगाएकामा खोपको असरलाई कम गरेर कोरोना संक्रमण गराउन डेल्टा भेरियन्ट सक्षम रहेको देखिएको हो ।

अध्ययनअनुसार भारतमा खोप लगाएका संक्रमितमध्ये दुवै मात्रा खोप लिने ६० प्रतिशत र एक मात्र खोप लगाउने ७७ प्रतिशत व्यक्तिमा डेल्टा भेरियन्ट संक्रमण भएको थियो । संक्रमितमा भाइरसको सक्रिय मात्रा अधिक भएको पाइएको अध्ययन प्रतिवेदनमा भनिएको छ । 

पछिल्ला केही दिन यता भारतमा कोरोना संक्रमण दर घटे पनि जोखिम भने कायम नै रहेको छ । डेल्टा भेरियन्टकै कारण भारतमा केही दिनअघिसम्म हरेक दिन ३ लाख बढी मानिस संक्रमित भइरहेका थिए । दक्षिण भारत यसबाट धेरै प्रभावित भएको र कर्नाटकमा ९३ प्रतिशत केस डेल्टा भेरियन्टको रहेको दावी सरकारको छ । 

ती संक्रमितहरुमा भाइरल लोडको स्तर अत्याधिक रहेको पाइएको डा.संजय रायले बताउनुभयो । भारतमा ब्रेक थु् र इन्फेक्सनका पछाडि कारण के हो भन्ने बुझ्न अध्ययन गरिएको र यसबाट डेल्टा भेरियन्टका कारण संक्रमित बढेको पाइएको उहाँले बताउनुभयो । 

अल्फा भेरियन्टभन्दा करिब ५० प्रतिशत संक्रामक रहेको डेल्टा भेरियन्ट हालसम्म बेलायत, अमेरिकासहित विश्वका ५३ मुलुकमा फैलिएको बताइएको छ । यो भेरियन्टको अक्टोबर २०२० मा भारतमा पहिलोपटक पहिचान गरिएको थियो । 

 बेलायतको तेस्रो लहरमा ६० प्रतिशत नयाँ केस यही भेरियन्टको थियो । त्यहाँ यो भेरियन्टबाट १२ देखि २० वर्ष उमेर समूहका व्यक्ति संक्रमित भएका छन् । 

डेल्टा भेरियन्टलाई विश्व स्वास्थ्य संगठन(डब्ल्यूएचओ)ले पनि घातक भेरियन्टका रुपमा राखी भेरियन्ट अफ कन्सर्नकाे श्रेणीमा राखेको छ ।