रुकुम पूर्व : सडक छैन, भएका पनि बन्द, बिरामीलाई स्ट्रेचर र पिठ्यूँको भर

रुकुम पूर्वका विभिन्न गाउँमा यातायातको सुविधा नहुँदा बिरामीलाई बोकेरै स्वास्थ्य संस्थासम्म लैजानु पर्ने बाध्यता छ । वर्षायामको शुरुवातसँगै पहिरोले ग्रामीण सडकहरु अवरुद्ध भएका छन् ।

सडक बन्द भएपछि बिरामीलाई स्टेचर तथा पिठ्यूमा बोकेर अस्पताल लैजाने र अस्पतालबाट घर लैजानु पर्ने अवस्था आएको छ । 

सडकमा ठाउँ–ठाउँ गएको पहिरो र खाल्डाखुल्डीले गर्दा सडकमा गाडी चल्न सकेका छैनन्। 

सवारी चलाउन मात्रै नभएर हिँड्डुल गर्न समेत समस्या छ । बिरामीलाई बोकेर अस्पताल लानुपर्दा बाटैमा बिरामीको ज्यान जाने जोखिम रहेको स्थानीयको गुनासो छ ।

अविरल वर्षाले गर्दा भूमे गाउँपालिकाको वडानम्बर ६ खाम्दै, स्याला, सुर्प, नाखे, रुन्ची तामारी लगायतका गाउँमा सडक यातायात अवरुद्ध छ।

वर्षातका कारण बिग्रे, भत्केका ग्रामिण सडकहरु मर्मत नहुँदा स्थानीलाई सास्ती भएको भूमे गाउँपालिका–३ का मनरखे सुनारको दुखेसो छ। 

‘बाटो बन्द छ, बिरामीलाई स्वास्थ्य चौकीसम्म लैजान स्टेचर वा पिठ्यूमा बोक्नेभन्दा अरु उपाय छैन’ सुनार भन्नुहुन्छ,  ‘युवाहरु गाउँमा छैनन, बोक्ने मान्छे पनि पाइँदैन ।’

युवाहरु विदेशिने र शहर पस्ने समस्याले गर्दा गाउँमा बुढाबुढी र बालबच्ची मात्रै रहेका रहेको उहाँ बताउनुहुन्छ।समयमा नै स्वास्थ्य संस्था सम्म पुरयाउन नसक्दा गत साउन २० गते २५ वर्षीय गर्भवती महिलको ज्यान गएको थियो । 

सुत्केरी व्यथा लागेपछि समयमै स्वास्थ्य संस्थामा पुर्‍याउने नसकिँदा सिस्ने गाउँपालिका–९ भट्टेचौर रुकुम पूर्वकी २५ वर्षीया सपना बुढाको ज्यान गएको थियो । 

कर्णाली प्रादेशिक अस्पताल सुर्खेतमा उपचारका क्रममा सपनाको मृत्यु भएको थियो । 

लुम्बिनी प्रदेशको एक मात्र हिमाली जिल्लाका रुकुमपूर्वमा अहिले पनि धेरै ठाउम्मा सडक पुगेको छैन । पुगेको ठाउँमा पनि वर्षाका कारण सडक बिग्रिएर सवारी पुग्ने अवस्था छैन ।