कोरोना संक्रमणकाे तेस्रो लहर, कहाँ - कहाँ हुँदैछ ?
तेस्रो लहर कस्ताे हाेला ?
काठमाडौं । पहिलो कोरोना भाइरस संक्रमित भेटिएको अहिले करिब एक वर्ष हुन लागेको छ । चीनको वुहान सहरमा गत डिसेम्बरमा भेटिएको यसको संक्रमण हालैका सातामा तेस्रो लहरमा प्रवेश गरेको बताउन थालिएको छ ।
यसको चरण मापनका लागि अहिलेसम्म कुनै पनि वैज्ञानिक मापदण्डहरू भने रहेका छैनन् । तैपनि विश्वभरिका मुलुकमा भेटिएका संक्रमित तथा तिनको संक्रमण दरलगायतलाई हेरेर यसका चरण वा लहर भन्न सकिन्छ ।
विश्वव्यापी तेस्रो लहर
जोन्स हप्किन्स विश्वविद्यालयको तथ्यांकअनुसार हालसम्म विश्वभर ५ करोड ५५ लाख बढी संक्रमिति भइसकेका छन् । जसमध्ये १३ लाख ३७ हजार बढीको ज्यान गएको छ । त्यस्तै ३ करोड ५७ लाखले स्वास्थ्यलाभ प्राप्त गरिसकेका छन् ।
विश्वका धेरै मुलुकमा अहिले कोरोना संक्रमण दर घट्दो क्रममा छ । कतिपय मुलुकमा भने तीव्र रूपमै संक्रमण फैलिरहेको छ । एउटै मुलकभित्र पनि विभिन्न सहरहरूमा फरक समयमा संक्रमण तीव्रता हुने गरेको छ ।
अलजजिराका अनुसार विश्व अहिले कोरोना भाइरस संक्रमणको तेस्रो चरणमा प्रवेश गरेको छ । औसत संक्रमित दरको विश्लेषण गर्दा यस्तो देखिएको हो । अमेरिका र युरोपको औसतलाई हेरेर यसको मापन गरिएको छ । किनभने विश्वको १४ प्रतिशत जनसंख्या ओगटेका अमेरिका र युरोपमा हाल आधा कोरोना संक्रमित यहीँ रहेका छन् ।
कुनकुन मुलकुले दोस्रो वा तेस्रो लहरको सामना गरिरहेका छन् त ?
एक साताको औसत संक्रमित संख्यालाई केलाएर हेर्दा अमेरिका, भारत र ब्राजिल सबभन्दा बढी संक्रमित भेटिएका मुलुकमा पर्छन् । जसमध्ये अमेरिका तेस्रो लहरमा प्रवेश गरेको मान्न सकिन्छ ।
अमेरिकामा अहिले हरेक दिन एक लाखभन्दा माथिको संख्यामा नयाँ संक्रमित भेटिएका छन् । पछिल्लो एक साताको तथ्यांकलाई हेर्ने हो भने करिब १ लाख १७ हजार बढी हरेक दिन नयाँ संक्रमित भेटिएका छन् ।
तर भारत र ब्राजिलले भने पहिलेकै ठुलो तथा लामो लहरको सामना गरिरहेका छन् भन्न सकिन्छ । युरोपको फ्रान्समा सबभन्दा पहिले पहिलो संक्रमित भेटिएको थियो । हाल युरोपका विभिन्न मुलुकहरूमा संक्रमण बढिरहेकै छ ।
कतिपय मुलुकले भने पुनः लकडाउन समेत गरेका छन् । त्यस्तै कतिपय मुलुकले भने प्रतिबन्ध लगाउँदै जीवनयापनलाई अगाडि बढाइरहेका छन् । यसर्थ युरोपका कतिपय मुलुकले दोस्रो र तेस्रो लहरको संक्रमणलाई सामना गरिरहेका छन् ।
चीनमा संक्रमण अत्यन्तै न्यून देखिएको छ । उसले महामारीलाई नियन्त्रणमा लिएर जनजीवनलाई सामान्यतर्फ मोडेको छ । मध्य एसियाका मुलुकमध्ये इरान सबभन्दा बढी प्रभावित भएको मुलुक हो । गत फेब्रुअरी १९ मा पहिलो संक्रमित भेटिएको इरानमा अहिले दोस्रो लहर चलिरहेको छ ।
इरानमा एक साताको संक्रमण दरलाई हेर्ने हो भने हरेक दिन १० हजार ४ सय बढी संक्रमित थपिइरहेका छन् । यहाँ उल्लेखित संक्रमित भन्नाले परीक्षण गरिएकामध्ये कोभिड–१९ पोजेटिभ देखिएको संख्या हो ।
मुलुकअनुसार यसको एकाई फरक हुन्छ । कतिपय मुलुकमा कम संक्रमित भएपनि ती मुलुकमा कम परीक्षण भएको वा सूचना सम्प्रेषण नगरेको पनि हुन सक्छ । त्यस्ता मुलुकमा पनि कोरोना संक्रमित धेरै हुन सक्छन् ।
तपाईँको अभिमत