राष्ट्रिय प्रत्यारोपण केन्द्रमा एक वर्षमा २०६ जनाको मिर्गाैला प्रत्यारोपण

शहीद धर्मभक्त राष्ट्रिय प्रत्यारोपण केन्द्रमा गएको एक वर्षमा २०६ जनाको मिर्गाैला प्रत्यारोपण भएको छ । 

सोही अवधिमा २७ हजार ८६७ सेसन हेमोडाइलाइसिस, २ लाख ३७ हजार ५५५ जनाको ल्याब टेस्ट, ८२२ वटा मेजर अपरेशन र ९९१ जनाको माइनर अपरेशन भएको केन्द्रले जानकारी दिएको छ । 

यसैगरी एक वर्षमा ५४ हजार ८३६ जनाले ओपिडीमा सेवा लिएको, १५९ जनाको क्याथ ल्याव सेवा र १९ सय १६ जनाकाे सिटिस्क्यान भएको छ । 

एक वर्षमा मस्तिष्क मृत्यु भएका व्यक्तिको अंगदानबाट ४ जनाको मिर्गाैला र २ जनाको कलेजो प्रत्यारोपण भएको छ । 

केन्द्रले आफ्नो ११ औं वार्षिक उत्सवका अवसरमा गरेको कार्यक्रममा एक वर्षमा केन्द्रबाट भएका सेवाको समिक्षा गर्दै उक्त जानकारी दिइएको हो ।  

कार्यक्रममा केन्द्रका कार्यकारी निर्देशक डा.पुकार चन्द्र श्रेष्ठले अस्पतालमा सम्पूर्ण चिकित्सक, नर्स प्राविधिक, प्रशासनिक,सरसफाइका कर्मचारी, सुरक्षा गार्ड लगायत सम्पूर्ण जनशक्तिको प्रतिवद्धता र योगदानबाट छोटो समयमा केन्द्रले धेरै उपलब्धि हासिल गरेको बताउनुभयो । 

उहाँले भावि योजना प्रस्तुत गर्दै केन्द्रलाई प्रत्यारोपण प्रतिष्ठान निर्माण गर्ने, सातै प्रदेशमा प्रत्यारोपण सेवा विस्तार गर्ने, केन्द्रको क्षमता विस्तार गरी ५०० शैयाको अत्याधुनिक सुविधा सम्पन्न केन्द्र बनाउने र यथाशक्य छिटो कर्मचारीको वृत्ति विकास हुने कार्यक्रमहरु गर्ने प्रतिवद्धता जनाउनुभयो । 

उत्कृष्ट सेवा गरेबापत् वार्डमा कार्यरत स्टाफ नर्स कमला शर्मालाई १० हजार नगदसहित सम्मान गरिएको थियो ।