प्रतिरोध प्रणालीसम्बन्धी अनुसन्धानका लागि तीन वैज्ञानिकलाई चिकित्साशास्त्रतर्फको नोबेल पुरस्कार

नोबेल पुरस्कार समितिले सन् २०२५ को चिकित्साशास्त्रतर्फको नोबेल पुरस्कार प्रतिरोध प्रणाली सम्बन्धी क्रान्तिकारी अनुसन्धान गर्ने तीन वैज्ञानिकलाई प्रदान गर्ने निर्णय गरेको छ । मेरी ब्रन्को, फ्रेड र्‍याम्स्डेल, र शिमोन साकागुचीलाई पुरस्कार प्रदान गर्ने निर्णय गरेको हो ।

समितिका अनुसार, यी वैज्ञानिकहरूले शरीरको प्रतिरोध प्रणालीमा “रेगुलेटरी टी–सेल भनिने विशेष प्रकारका कोषहरूको पहिचान गरी तिनीहरूको प्रमुख भूमिका उजागर गरेका हुन्। यी कोषहरूले शरीरमा रोगसँग लड्ने र प्रतिरक्षा सन्तुलन कायम राख्ने महत्त्वपूर्ण कार्य गर्छन्।

उनीहरूको खोजले प्रतिरक्षा प्रणाली सम्बन्धी अध्ययनमा नयाँ दृष्टिकोण ल्याएको र आधुनिक चिकित्सा अनुसन्धानका लागि नयाँ मार्ग खोलेको समितिको भनाइ छ। यस उपलब्धिले अटोइम्यून रोगहरू .(जहाँ शरीरले आफ्नै कोषहरूमाथि आक्रमण गर्छ) को उपचारमा क्रान्ति ल्याउन सक्ने, क्यान्सर उपचारलाई अझ प्रभावकारी बनाउन सहयोग पुर्‍याउने तथा स्टेम सेल प्रत्यारोपणपछि हुने जटिलता रोकथाम गर्न मद्दत गर्ने अपेक्षा गरिएको छ।

नोबेल समितिले जनाएअनुसार, तिनै वैज्ञानिकहरूको खोजले “प्रतिरक्षा नियन्त्रण” को अवधारणालाई गहिरो रूपमा परिभाषित गर्दै विश्वव्यापी चिकित्साशास्त्रको दिशा नै परिवर्तन गर्न सक्ने सम्भावना देखाएको छ।