स्वास्थ्य बीमा उपचार प्रोटोकल बनाउन स्वास्थ्य मन्त्रालयले गर्‍यो विज्ञ समिति गठन

स्वास्थ्य बीमा उपचार प्रोटोकल बनाउने तयारी गरिएको छ । स्वास्थ्य तथा जनसंख्या मन्त्रालयले उपचार तथा निदानका लागि प्रोटोकल निर्माणको तयारी थालेको हो । यसका लागि प्रोटोकल तयार पार्न मन्त्रालयले विज्ञ समिति गठन गरेको छ ।

कतिपय अवस्थामा आधारभूत स्वास्थ्य सेवामा दोहोरोपना आइरहेको देखिएकाले त्यसलाई सुधार गरी मापदण्ड बनाउनका लागि समिति गठन गरिएको मन्त्रालय बताइएको छ । 

हाल विभिन्न सरकारहरुले आधारभूत सेवामा निःशुल्क औषधिका लागि रकम विनियोजन गरे पनि स्वास्थ्य बीमामा समेत दावी आउँदा भुक्तानी दायित्व बढेको र खर्चको दोहोरोपना देखिएको विज्ञहरुले बताउने गरेका छन् । योसहितका प्राविधिक विषयमा समितिले प्रोटोकल तयार पार्नेछ।

एक महिनाभित्र प्रतिवेदन दिने गरी गठन गरेको समितिले स्तरीय निदान तथा उपचार प्रोटोकल समेत तयार पार्नेछ । यसका लागि स्वास्थ्य सेवा विभागका पूर्व महानिर्देशक डा. राजेन्द्र पन्त नेतृत्वको समिति गठन गरिएको छ।

समितिले प्रथम सेवा बिन्दुमा उपलब्ध हुने सेवामा प्रष्टताका लागि समेत सुझाव दिने कार्यादेश प्राप्त गरेको छ । यसका अलावा बिरामी रेफर गर्ने अवस्था तथा विधिसमेत समितिले निर्धारण गर्नेछ।

समितिलाई आधारभूत सेवाबाहेक बीमामार्फत् प्राप्त हुने सेवा प्याकेजसमेत निर्धारणका लागि कार्यादेश दिइएको मन्त्रालयका प्रवक्ता डा. प्रकाश बुढाथोकीले जानकारी दिनुभयो ।