जेन जीका नाममा निजी स्वास्थ्य संस्था एवम् एम्बुलेन्स तोडफोड हुनुलाई सभ्य समाजको परिचय मान्न सकिन्न : अफिन

निजी स्वास्थ्य संस्थाहरूको संस्था एसोसिएसन अफ प्राइभेट हेल्थ इन्स्तिच्यूसन अफ नेपाल (अफिन)ले जेन जीका नाममा तोडफोड र आगजनी हुनुलाई सभ्य समाजको परिचय मान्न नसकिने बताएको छ । आइतबार अध्यक्ष डा. पदमबहादुर खड्काले विज्ञप्ति जारी गर्दै स्वास्थ्य संस्था, एम्बुलेन्स तथा निजी स्वास्थ्य संस्था सञ्चालकको निजी सम्पत्तिमा समेत तोडफोड र आगजनी गरिएको भन्दै त्यसको भर्त्सना गरिएको हो ।

अफिनका पूर्व अध्यक्ष एवम् नर्भिक अस्पतालका अध्यक्ष बसन्तकुमार चौधरी, पूर्व केन्द्रीय सदस्य एवम् मेडिसिटी अस्पतालका अध्यक्ष डा. उपेन्द्र महतो लगायतको निजी सम्पत्तिसमेतमा भएको तोडफोड अस्वीकार्य भएको अफिनले जनाएको छ ।

गत भदौ २३ र २४ गतेको जेनजी आन्दोलनका क्रममा आगलागी, लुटपाट र तोडफोडका घटनाले सम्पूर्ण स्वास्थ्य क्षेत्रलाई आघात पुर्‍याएको अफिनले जनाएको छ। विज्ञप्तिमा भनिएको छ, ‘निजी स्वास्थ्य संस्थाहरू, एम्बुलेन्स, निवासहरू जेनजीको नाममा तोडफोड, आगजनी हुनुलाई पक्कै पनि सभ्य समाजको परिचयका रूपमा लिन सकिदैन ।’

अफिनले यस्ता घटनामा संलग्न दोषीलाई कानूनी कारबाही गर्न माग गरेको छ। साथै, आन्दोलनमा परी घाइते भएकाहरूको शीघ्र स्वास्थ्यलाभको कामना गर्दै उपचारमा संलग्न सम्पूर्ण स्वास्थ्य संस्था र स्वास्थ्यकर्मीहरूको भूमिकाको उच्च प्रशंसा गरेको छ।