काठमाडौंमा जोडिएकै सहरमा सात दिनसम्म रिपोर्ट आउँदैन, १६ काे परीक्षणमा १४ पाेजेटिभ
थाहा नगरपालिकामा कुल जनसंख्याकाे जम्मा १.१८ प्रतिशतकाे मात्र परीक्षण
काठमाडौं । मकवानपुर जिल्लाको थाहा नगरपालिकामा पीसीआर परीक्षण भएको एक हप्तासम्म पनि रिपोर्ट नआउदा घर–घरमै संक्रमण फैलिरहेको छ ।
कुल जनसंख्याकाे जम्मा १.१८ प्रतिशतकाे मात्र परीक्षण हुनु भनेकाे परीक्षणदर अत्यन्त न्यून हाे ।
आज १६ जनाकाे एन्टीजेन परीक्षण गर्दा १४ जनाकाे रिपोर्ट पाेजेटिभ आएकाे छ । समुदायस्तरमा परीक्षणकाे दायरा नबढाइदा टाेल–टाेलमै व्यापकरुपमा संक्रमण फैलिएकाे छ । कुल ४६ हजार १४५ जनसंख्या रहेकाे थाहा नगरमा वैशाख १२ गतेदेखि पीसीआर र एन्टीजेन गरि जेठ सात गतेसम्म जम्मा ५४७ जनाको परीक्षण भएको छ । जसमा २९० जनालाई पोजेटिभ देखिएको छ भने ४ संक्रमितको मृत्यु भएको छ ।
कुल जनसंख्याकाे जम्मा १.१८ प्रतिशतकाे मात्र परीक्षण हुनु भनेकाे परीक्षणदर अत्यन्त न्यून हाे । थाहा नगरमा लक्षण भएकाहरुको नमुना संकलन गर्दा परीक्षणको ५३ प्रतिशतलाई संक्रमण पुष्टि भएको देखिन्छ । परीक्षण नै नभएका कारण लक्षण नभएका संक्रमित कति छन् यसको कुनै लेखाजोखा नै छैन । न कुनै तथ्यांक नै छ । कुल परीक्षणको ५३ प्रतिशतलाई संक्रमण पुष्टि हुनुले पुरै थाहा नगरमा काेराेना फैलिएकाे बुझ्न सकिन्छ ।अहिले थाहा नगरको अवस्था भयावह छ ।
अझ कोरोनाको लक्षण देखि परीक्षण गराएको एक हप्तासम्म पनि रिपोर्ट नआउदा थाहा नगरको घर घरमा संक्रमण फैलंदा पुरा परिवारनै संक्रमित भइरहेका छन् । साथै लक्षण भएकाहरुको पनि कोरोना परीक्षण हुन सकिरहेको छैन भने कन्ट्याक्ट ट्रेसिङ शुन्य छ ।
टोल–टोलमा रुघाखोकी, ज्वरोका बिरामी बढिरहेका छन् तर उनीहरुको परीक्षण हुन सकिरहेको छैन । नगरको यस्तो अवस्थाबारे स्थानिय निकायका प्रतिनिधिहरुसमेत आवश्यकता अनुरुप ध्यान नदिएकाे स्थानिय वासिन्दाकाे गुनासो छ ।
नगरस्वाथ्य प्रमुख मेघराज बलामीले ल्याबको कमी भएका कारण रिपोर्ट आउन ढिला भइरहेको बताउनुभयो । हामीले नमुना संकलन गरि हेटौडा अस्पतालको ल्याबमा पठाउछाैं । अहिले मकवानपुरमा एउटामात्रै ल्याब भएकाले हप्ताैं दिनसम्म रिपोर्ट आउदैन । उहाँले भन्नुभयो, यो समस्या गतसाल पनि थियो अहिले झन बढेको छ ।
जिल्ला कोभिड संयोजक भोला चौलागाईंले रिपोर्ट ढिला आउने समस्या थाहामा मात्रै नभई जिल्लाकै रहेको बताउनुभयो । एउटा मात्रै ल्याब भएको र त्यो ल्याबमा पनि ड्युटी समयमा मात्रै काम हुने भएकाले यस्तो समस्या देखिएको जानकारी दिनुभयो । जनशक्ति अभावका कारण थप समय ल्याव सञ्चालन गर्न नसकिएको उहाँको भनाइ छ । ल्यावमा अहिले ५ जना मात्र प्राविधिक छन् ।
काठमाडौंसँग जोडिएको थाहा नगरमा पीसीआर परीक्षण गरेको सात दिनसम्म रिपोर्ट नआउँदापनि हेटौडाको ल्यावको विकल्प खोज्न स्थानिय सरकारले तत्पर नभएको देखिन्छ । थाहानगरकाे केन्द्रबाट यातायात मार्फत काठमाडौंका ल्याव आइपुग्न २ घण्टामात्रै लाग्छ । स्थानिय निकाय र स्वास्थ्य कार्यालयले काठमाडौंका ल्यावहरुसँग समन्वय गरि नमुना ल्याउन सक्छन् तर त्यसो हुन सकिरहेको छैन ।
थाहा नगर प्रमुख लबशेर विष्टले परीक्षणका लागि वडा कार्यालयहरुमा शिविर चलाइएको तर त्यस समयमा परीक्षण गराउनेको संख्य एकदमै न्यून रहेको बताउँनुभयो । रिपोर्ट आउन ढिला भइरहेको स्वीकार गर्दै मेयर विष्टले राष्ट्रिय सभाको चुनावका कारण जन प्रतिनिधिहरुको स्वाब परीक्षण गर्दा पहिला संकलन गरिएको नमुनाको परीक्षण हुन नसकेको बताउनुभयो ।
नगरपालिकाले खरिद गरेको एन्टीजेन टेस्ट किट ५ सय थान मौज्दात रहेको र ती किटबाट लक्षण भएका व्यक्तिहरुको परीक्षण भइरहेको दाबी गर्नुभयो ।
तपाईँको अभिमत