३ दिनमा २ जनाको कलेजो प्रत्यारोपण, राष्ट्रिय प्रत्यारोपण केन्द्रमा १३ पुग्यो

भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा एक सातामा २ जनाको कलेजो प्रत्यारोपण गरिएको छ । 

केन्द्रले दिएको जानकारी अनुसार साउन ३२ गते सल्यानका ५२ वर्षीय कृष्ण बहादुर केसीको कलेजो प्रत्यारोपण गरिएको थियो । उनलाई छोरा २३ बर्षीय किरण के.सीले कलेजो दान गरेका हुन् ।

त्यसैगरी भदौ २ गते ५७ वर्षीय कुमार राईको कलेजो प्रत्यारोपण गरिएको केन्द्रले जानकारी दिएको छ । राईलाई २१ वर्षीया छोरी प्रतिक्षा राईले कलेजो दान दिएकी छिन् ।

प्रत्यारोपणको नेतृत्व केन्द्रका कार्यकारी निर्देशक डा.पुकारचन्द्र श्रेष्ठले गर्नुभएको थियो । 

सहयोगका लागि भारतबाट कलेजो प्रत्यारोपण शल्य चिकित्साक डा.शिल्भा कुमार नागानाथन आउनुभएको थियो । 

सो प्रत्यारोपणमा सर्जन डा.रोशन घिमिरे, डा.सपना बर्मा, डा राम बाबु साह, डा.ललित कुमार दास, कलेजो फिजिसियन डा.कर्ण राजवंशी, एनेस्थेसिया तथा क्रिटिकल केयरमा डा.आरती राईको सहभागिता थियो । 

त्यसैगरी डा.निभा श्रेष्ठ, डा.शोभित थापा, डा.रेखा श्रेष्ठ, डा.रश्मित श्रेष्ठ, डा. शिवसुन्दर जचल हुनुहुन्थ्यो । रेडियोलोजी विभागको नेतृत्व डा.कृष्ण बुढाथोकी,  डा.समीर दवाडी, डा. विवेक नेपाल, डा.जस्मिन जोशीले गर्नुभएको थियो । नर्सिङतर्फ पूजा कोइरालाको नेतृत्वमा बबिता लवजु, अनिता कार्की लगायतको टोलीले प्रत्यारोपणमा सहभागि थियो । 

त्यसैगरी प्रत्यारोपण गर्ने बिरामीको चेक जाँच तथा तयारी कार्य केन्द्रका प्रत्यारोपण कोर्डिनेरहरु, तारा साँध, शनिषा कार्की, सरु कोजुले गर्नुभएको थियो ।

केन्द्र आफैं सक्षम हुँदै गएकोले आगामी दिनमा विदेशी विशेषज्ञ चिकित्सकको सहयोग आवश्यक नपर्ने केन्द्रका कार्यकारी निर्देशक तथा कलेजो प्रत्यारोपण सर्जन डा.पुकार चन्द्र श्रेष्ठले बताउनुभयो । 

संसारमै सबैभन्दा जटिल शल्यक्रिया मानिने कलेजो प्रत्यारोपण स्वदेशमै त्यो पनि १५ लाखमा हुने गरेको डा.पुकार बताउनुहुन्छ । केन्द्र स्थापना कालदेखि अहिलेसम्म अवधिमा ११०० जनाको सफल मिर्गौला प्रत्यारोपण गरिएको छ । 

गरेको केन्द्रले २०७४ बैशाख २८ गते पहिलो पटक मस्तिष्क मृत व्यक्तिको अङ्गबाट प्रत्यारोपण सुरु गरेको थियो अहिलेसम्म पाँच जना व्यक्तिबाट मस्तिष्क मृत्यू भएको अंग प्राप्त गरी १३ जनामा प्रत्यारोपण गरेको छ ।