नेपालमा बढ्दै कोभिड–१९ सङ्क्रमितहरू बढ्दै, एकै सातामा ३५ जना सङ्क्रमित

नेपालमा कोभिड–१९ सङ्क्रमण पुनः बढ्ने सङ्केत देखिएको छ। पछिल्लो सातामा ३५ नयाँ सङ्क्रमित थपिएका छन् भने २४ घण्टामा ३ नयाँ सङ्क्रमित पुष्टि भएका छन्। 

हालसम्म देशभर २४९ जना संक्रमित भइसकेका छन्। ३१ जिल्लाहरूबाट केस रिपोर्ट भएका छन्, भने १ जनाको मृत्यु भइसकेको पुष्टि भएको छ। यद्यपि मृतकलाई अन्य दीर्घरोग पनि रहेको इपिडिमियोलोजी तथा रोग नियन्त्रण केन्द्रले जनाएको छ ।

प्रदेशगत तथ्याङ्क हेर्दा, बागमती प्रदेश सबैभन्दा बढी प्रभावित देखिएको छ। पछिल्लो सातामा यहाँ २६ जना नयाँ संक्रमित फेला परेका छन्, जसले कुल संक्रमित संख्या १९२ पुर्‍याएको छ। यो देशभरका कुल संक्रमितमध्ये ७७ प्रतिशतभन्दा बढी हो। अन्य प्रभावित प्रदेशहरूमा कोशी, गण्डकी, लुम्बिनी र मधेश रहेका छन् भने कर्णाली र सुदूरपश्चिमबाट यस साता कुनै नयाँ सङ्क्रमित देखिएको छैन।

साप्ताहिक विवरणअनुसार, २५ देखि २७ औं हप्तासम्म केसमा उल्लेख्य वृद्धि देखिएको छ। विशेष गरी २६ औं हप्तामा ५९ जना संक्रमित थपिएकाले, कोभिडको नयाँ लहर आउन सक्ने चिन्ता बढेको छ।

त्यस्तै, डेंगी संक्रमणको अवस्था अझै गम्भीर रहेको छ। हालसम्म १,६७७ जना संक्रमित फेला परिसकेका छन् भने ७३ जिल्लामा  फैलिइसकेको छ। पछिल्लो सातामा ६३ जना नयाँ डेंगी संक्रमित भेटिएका छन्। यद्यपि हालसम्म डेंगुका कारण मृत्यु भएको छैन ।

स्वास्थ्य विज्ञहरूले दुबै रोगबाट जोगिनका लागि सावधानी, परीक्षणमा ध्यान दिन आग्रह गरेका छन् ।