निषेधाज्ञा आजदेखि खुकुलो, खाद्यान्न पसलदेखि मोटरसाइकल वर्कसपसम्म खुला

काठमाडौं । कोरोना महामारीको चेन ब्रेक गर्न भन्दै किराना पसलहरु समेत बन्द गरेर एक हप्ता कडा पारिएको काठमाडौँ उपत्यकाको निषेधाज्ञा आजदेखि केही खुकुलो भएको छ ।

आजदेखि तरकारी, फलफूल, दूध, मासु, खानेपानी लगायत सेवा एवं किराना पसल बिहान ९ बजेसम्म खोल्न पाइने भएको छ । 
डिपार्टमेन्टल स्टोरमा भने ग्रोसरीमात्र खोल्न दिइने छ । राति ९ बजेदेखि बिहान ९ बजेसम्मको लागि निर्माण सामग्रीको ढुवानीका साधनहरू सञ्चालनको अनुमति दिइएको छ ।

बैंक तथा वित्तीय संस्थाको हकमा प्रधान कार्यालय र ३ वटा शाखा वाणिज्य बैंकले, विकास बैंकले प्रधान कार्यालय र २ वटा शाखा, वित्त कम्पनीले प्रधान कार्यालय र एक वटा शाखा खेलेर सेवा दिन पाउने छन् ।

अत्यावश्यक बाहेकका सरकारी कार्यालय, सार्वजनिक संस्थान र बिमा लगायतका कार्यालयको सेवा प्रवाह हाललाई स्थगित गरिएको छ । जेठ ३१ गतेसम्म थप गरिएको निषेधाज्ञामा खाद्यान्न पसलदेखि मोटरसाइकल वर्कसपसम्मका केही सेवाहरुलाई भने खुला गरिएको हो आजदेखि बिहान नौ बजेसम्म वर्कसप पनि खोल्न दिइने भएको छ ।

गएको १४ गतेदेखि १ हप्ता कडा पारिएको निषेधाज्ञा आजबाट केही खुकुलो पारी १० दिनका लागि थप गरिएको छ ।