नयाँ स्वास्थ्य मन्त्रीमा प्रदीप पौडेल, भोलि नियुक्ति
एमालेबाट स्वास्थ्य मन्त्री बन्नुभएका पदम गिरीले फागुन १५ गते पदबाट राजीनामा दिएपछि करिब १ महिनादेखि स्वास्थ्य मन्त्रालय मन्त्रीविहीन छ ।
नेपाली कांग्रेससहितको नयाँ गठबन्धन भएपछि सरकार विस्तारको तयारी अन्तिम चरणमा छ । आज छलफल सकेर भोलि मन्त्रिपरिषद् विस्तारको टुंगो लगाउने तयारी सत्ता साझेदार दलले गरिरहेका छन्।
प्रारम्भिक सहमतिमा स्वास्थ्य तथा जनसंख्या मन्त्रालय नेपाली कांग्रेस भागमा पर्ने सहमति भएको प्रधानमन्त्रीनिकट स्रोतले जानकारी दिएको छ ।
स्रोतका अनुसार स्वास्थ्य मन्त्रीमा नेपाली कांग्रेसबाट प्रदीप पौडेलको नाममा सहमति भएको छ ।
नेपाली कांग्रेसबाट पूर्णबहादुर खड्काको नेतृत्वमा सरकारमा जाने सहमति भएको छ । खड्का गृह वा अर्थमन्त्रालय लिएर कांग्रेसबाट सरकारको नेतृत्व गर्ने स्रोतको भनाइ छ ।
राष्ट्रपति रामचन्द्र पौडेलनिकट प्रदीप महामन्त्री गगन थापानिकट समेत हुनुहुन्छ ।
काठमाडौं क्षेत्र नम्बर ५ बाट नेकपा एमालेका बरिष्ठ उपाध्यक्ष ईश्वर पोखरेललाई पराजित गर्दै प्रदीप निर्वाचित हुनुभएको थियो।
गगन थापा अहिले सरकारमा सहभागी नहुने भएकाले प्रदीप पौडेल स्वास्थ्य मन्त्रालय लिएर सरकारमा जान लागेको स्रोतले जानकारी दियो।
अन्तिममा अन्य सत्ता साझेदार दलसँग सहमति गर्दा हेरफेर गर्नुपर्ने अवस्था नआए स्वास्थ्य मन्त्रीमा प्रदीप पौडेलको नाम लगभग पक्का भएको स्रोतको दावी छ ।
तपाईँको अभिमत