‘मधुमेहका बिरामीले अनुहार होइन खुट्टा हेर्नुपर्छ' (भिडियो)

चिकित्सकहरू मधुमेहलाई साइलेन्स किलर पनि भन्ने गर्छन् । वीर अस्पतालमा कार्यरत मधुमेह तथा हर्माेन रोग विशेषज्ञ डा.दीपक मल्लले मधुमेहले भित्रभित्रै अंगहरुमा क्षति पुर्‍याइरहेको थाहा नहुने भएकाले यसलाई साइलेन्स किलर भनिएको बताउनुभयो । 

मधुमेह भएका बिरामीहरुमा दुखाइ महसुस नहुने भएकाले उनीहरुले घाउ चोटपटक लागिसकेको पनि थाहा नपाउने डा.मल्ले बताउनुभयो। 
डा. मल्लले हालैको एक घटना सुनाउनुभयो । ‘एक जना आमा हुनुन्थ्यो, उहाँले जाडोमा आगो ताप्दा खुट्टालाई पनि सेकाउने गर्नुहुँदो रहेछ । नियमित ताप्दा- ताप्दा आगोले पाइतालामा घाउ बनाइसकेको पत्तो पाउनु भएन । दुखाइ नहुने भएकाले धेरै ढिला मात्रै उहाँले घाउ भएको थाहा पाउनु भएछ । संक्रमण फैलिएर उहाँको खुट्टा काट्नु पर्‍यो ।’

मधुमेहका बिरामीले अनुहार होइन खुट्टा र जुत्ता हेर्न आवश्यक रहेको उहाँ बताउनुहुन्छ । जुत्तामा किला, ढुंगाहरू रहेका हुन सक्छन्, खुट्टाका औलाका कापमा घाउ भएको हुनसक्छ, संक्रमण फैलन सक्छ, त्यसैले अनुहार होइन खुट्टा हेर्न डा. मल्लको सुझाव छ।