स्वासप्रश्वास रोगको उपचारका लागि मानभवनमा विशिष्टिकृत क्लिनिक सञ्चालनमा

ललितपुर महानगरपालिका–१३, मानभवनमा स्वासप्रश्वास ९छाती० सम्बन्धी रोगको विशेषज्ञ उपचारका लागि नेशनल चेष्ट सेन्टर सञ्चालनमा आएको छ। नेपालमै पहिलो पटक स्वासप्रश्वास रोगमा केन्द्रित भएर स्थापना गरिएको यस सेन्टरले विशेषज्ञ, गुणस्तरीय तथा सहुलियत दरमा सेवा प्रदान गर्ने जनाएको छ।

सेन्टरको ललितपुर महानरपालिका १३ का वडाध्यक्ष गणेश केसीले शनिबार उद्घाटन गर्नुभयो । उद्घाटनका क्रममा उहाँले आफ्नो वडामा विशिष्टिकृत क्लिनिक खुलेकोमा खुसी व्यक्त गर्नुभयो । उहाँले वडा सहकार्य गर्न तयार रहेको भन्दै क्लिनिक साँच्चिकै गुणस्तरीय सेवा दिन सफल होस् भन्ने कामना व्यक्त गर्नुभयो ।

सेन्टरका अनुसार विश्व स्वास्थ्य संगठनको तथ्यांकले विश्वभर प्रत्येक वर्ष करोडौँ मानिस स्वासप्रश्वास रोगबाट प्रभावित हुने देखाएको छ भने नेपालमा पनि करिब १०–१२ प्रतिशत वयस्कमा दीर्घकालीन स्वासप्रश्वास समस्या रहेको अनुमान छ। बढ्दो वायु प्रदूषण, धूम्रपान तथा कोभिड–१९ पछिको असरका कारण बिरामीको संख्या बढिरहेको चिकित्सकहरूले बताएका छन्। अझ नेपालजस्तो विकासोन्मुख मुलुकहरूमा स्वासप्रश्वासबाट मृत्युदर धेरै रहेकाले विशेष उपचार आवश्यक रहेको वरिष्ठ छातीरोग विशेषज्ञ डा. राजु पंगेनीले बताउनुभयो ।

सेन्टरमा फोक्सोको कार्यक्षमता परीक्षण, डिजिटल एक्स–रे, एलर्जी तथा दम परीक्षण, सिओपीडी, क्षयरोग तथा कोभिडपछि देखिने समस्या सम्बन्धी परीक्षण तथा उपचार, धूम्रपान त्याग परामर्श, प्रयोगशाला र फार्मेसीसहित एकीकृत सेवा उपलब्ध गराइने बताइएको छ ।

सेन्टरले उपचारसँगै स्वासप्रश्वास रोगको रोकथाम, जनचेतना अभिवृद्धि तथा नियमित परीक्षणको प्रवर्द्धनमा समेत जोड दिने जनाएको छ। काठमाडौं उपत्यकासहित देशभरका बिरामीलाई सेवा दिने लक्ष्य सेन्टरले राखेको छ।