चिकित्सक संघको चौथो राष्ट्रिय हेल्थ समिट मंसिर २८ र २९ गते हुने 

नेपाल चिकित्सक संघ(एनएमए)को चौथो राष्ट्रिय हेल्थ समिट यही मंसिर २८ र २९ गते हुने भएको छ। सम्मेलनका विषयमा जानकारी दिन बुधबार आयोजित पत्रकार सम्मेलनमा संघका महासचिव डा. सन्जिब तिवारीले ‘हेल्थ वियोन्ड हेल्थ’ भन्ने मुख्य सन्देश सहित काठमाडौंमा दुई दिन सम्मेलन हुन लागेको जानकारी दिनुभयो । 

चिकित्सक संघले प्रत्येक वर्ष वार्षिक क्यालेण्डर इभेन्टको रुपमा आयोजना गर्दै आएको एनएमए नेसनल हेल्थ समिटलाई यस वर्ष पनि निरन्तरता दिने संघको केन्द्रीय कार्यकारिणी समितिको निर्णय बमोजिम यस वर्षको चौथो सम्मेलन २०८१ मङ्सिर २८ र २९ गतेलाई तय गरिएको महासचिव तिवारीले बताउनुभयो । 

डा. तिवारीका अनुसार सम्मेलनको पूरक सन्देश स्वास्थ्य तथा जनसंख्या मन्त्रालय र अन्य मन्त्रालयहरु लगायत विविन्न सरोकारवाला सरकारी तथा गैरसरकारी निकायहरुसँग छलफल गरी दिगो विकास लक्ष्यतर्फ अग्रसर हुनका लागि एकीकृत रणनीति बनाउने गरी तय गर्ने योजना बनाइएको छ।

उक्त कार्यक्रम विषयविज्ञ, प्रबुद्धवर्ग, नेतृत्वकर्ता तथा सरोकारवालाहरुको प्रत्यक्ष सहभागितामा नीतिगत विचार विमर्ष मार्फत सैद्धान्तिक बहससहित आयोजना हुनेछ । यो वर्षको मुख्य सन्देश हेल्थ वियोन्ड हेल्थ राखिएको छ।

उक्त सम्मेलनको समापन पश्चात् वैज्ञानिक रुपमा प्रस्तुत गरिएका कार्यपत्र, छलफल र निचोडलाई एकीकृत गरी रणनीतिमूलक नीतिगत सुझाव गत बर्षझैं नेपाल सरकार, स्वास्थ्य तथा जनसंख्या मन्त्रालय लगायत देशभरका सरोकारवाला निकायमा सम्प्रेषण गरिने संघले जनाएको छ । 

एनएमएका अध्यक्ष डा. अनिल कार्कीले स्वास्थ्य अनुसन्धानका विषयलाई उजागर गर्न तथा नीतिगत रुपमा राज्यलाई सुझाव पेश गर्न सम्मेलन महत्वपूर्ण हुने बताउनुभयो।