भेटिनुभयो सम्पर्कविहीन हुनुभएका डा. श्रेष्ठ, परिवारलाई जिम्मापछि पुर्याइयो अस्पताल
हेल्थपाटी - आषाढ ०२, २०८२ २१:०१ मा प्रकाशित
अ +
अ -
सामाजिक सञ्जाल फेसबुकमा ‘सुसाइड नोट’ लेखेर सम्पर्कविहीन हुनुभएका डा. केशव श्रेष्ठलाई भेटिएको छ । काठमाडौं प्रहरी परिसरका अनुसार उहाँलाई तारकेश्वर नगरपालिका वडा नम्बर ३ स्थित बुटिक रिसोर्ट नजिक फेला पारिएको हो ।
डा. श्रेष्ठलाई भेटिनेवित्तिकै परिवारको जिम्मा लगाइएको प्रहरीको भनाइ छ ।
रामेछाम अस्पतालको निमित्त मेडिकल सुपरिटेन्डेन्टबाट हेटौडा अस्पताल सुरुवा गरिनुभएका उहाँले सोमबार बिहान सुसाइड नोट फेसबुकमा लेखेर सम्पर्कविहीन हुनुभएको थियो । उहाँ तीन अगाडि मात्र सुरुवा हुनुभएको थियो । आफूलाई जबरजस्त सरुवा गरिएको उहाँले बताउनुभएको छ ।
प्रहरीका अनुसार चाबहिलस्थित गोपीकृष्ण चलचित्र हलनजिक उहाँको अन्तिम लोकेसन ट्रयाक भएको थियो । सूचना पाउनेवित्तिकै प्रहरीले खोजी कार्य गरेको थियो ।
बेलारुसबाट अध्ययन पूरा गरी नेपाल आउनुभएका डा. श्रेष्ठ नेपाल प्रहरी अस्पतालमा पनि कार्य गर्नुभएको थियो । पछि वागमती प्रदेश लोकसेवाबाट प्रदेशअन्तर्गत आठौँ तहमा २५ महिनाअघि नाम निकाल्नु भई डेढ वर्षअघिदेखि रामेछाप अस्पतालको निमित्त मेसुको जिम्मेवारीमा हुनुहुन्थ्यो ।
जबरजस्त पदच्यूत र अपमान गरेपछि उहाँको मन टुट्यो : डा. बस्नेत
डा. श्रेष्ठलाई गुण्डागर्दी शैलीमा मेसुबाट पदच्यूत गरी यातना दिएपछि यस्तो अवस्था आएको स्वास्थ्य मन्त्रालयका मानसिक स्वास्थ्य विज्ञ सल्लाहकार डा. रविन बस्नेतले बताउनुभयो । डा. श्रेष्ठ इमानदार चिकित्सक तथा प्रशासक भएकै कारण खराब मानसिकता भएकाहरूले अपमानजनक एवम् झुठा आरोप लगाउँदै पदच्यूत गरेपछि उहाँमा यस्तो मानसिक अवस्था सिर्जना भएको डा. बस्नेको भनाइ छ ।
‘रामेछाप अस्पताललाई उहाँले (डा. श्रेष्ठले) वागमती प्रदेशको दोस्रो उत्कृष्ट अस्पताल बनाउनुभयो’, डा. बस्नेतले हेल्थपाटीसँग भन्नुभयो, ‘स्थानीय गुण्डाहरूले पदच्यूत गराइसकेपछि उहाँ काठमाडौं आउनुभयो । त्यसपछि पनि विभिन्न लान्छना लगाउने काम गरिरहे । मानसिक टर्चर दिने काम गरे ।’ उहाँका अनुसार डा. श्रेष्ठ जस्तो सुझबुझ भएको इमानदार व्यक्तिलाई त्यसले असह्य भएर ‘सुसाइड अटेम्प्ट’ भएको हो ।
'उहाँ विदेशमा भएका सुविधा र अवसरहरू छाडेर नेपालमा केही गर्ने सोँच बनाएर फर्किनुभएको हो । आखिरमा काम गर्न दिइरहेका छैनन्', डा. बस्नेतले भन्नुभयो, 'जति नै बलियो व्यक्ति पनि कुनै विन्दुमा गएर टुट्न सक्छ ।'
प्रहरी, चिकित्सक, सञ्चारमाध्यमलगायतको संयमतापूर्ण तथा सुझबुझपूर्ण तत्कालीन खोजपूर्ण कार्यले समयमै फेला पार्न सकिएको उहाँले जानकारी दिनुभयो ।
डा. बस्नेका अनुसार डा. श्रेष्ठलाई साँझ आत्मन अस्पताल एन्ड हिलिङ सेन्टरमा पुर्याइएको जानकारी दिनुभयो ।
अहिले डा. श्रेष्ठलाई ठूलो मान्छे, शिक्षित मान्छे भनेर ‘गाली’ भन्दा सहानुभूति आवश्यक रहेको र फेरि ‘सुसाइड अटेम्प्ट’ नहुने वातावरण सिर्जना गर्न आवश्यक रहेको उहाँले बताउनुभयो ।
तपाईँको अभिमत