मिर्गौला प्रत्यारोपण पश्चात् सगरमाथा आरोहण गर्ने पहिलो व्यक्ति शेर्पा स्वास्थ्य मन्त्रालय र प्रत्यारोपण केन्द्रद्वारा सम्मानित
हेल्थपाटी - जेष्ठ १६, २०८२ १६:१४ मा प्रकाशित
अ +
अ -
सगरमाथा आरोही पेम्बा शेर्पालाई स्वास्थ्य तथा जनसङ्ख्या मन्त्रालयले सम्मान गरेको छ । शुक्रबार मन्त्रालयमा भएको एक विशेष कार्यक्रममा स्वास्थयमन्त्री प्रदीप पौडेलले दोसल्ला ओडाएर सम्मान गर्नुभएको हो ।
शेर्पा मिर्गौला प्रत्यारोपण पश्चात् विश्वको सर्वोच्च शिखर सफलतापूर्वक चढ्ने पहिलो व्यक्ति हुनुभएको भन्दै मन्त्रालयसँगै शहीद धर्मभक्त राष्ट्रिय प्रत्यारोपण केन्द्रले सम्मान गरेका हुन् । केन्द्रले शेर्पालाई नगदसहित सम्मान गरेको हो ।
केन्द्रका कार्यकारी निर्देशक डा. पुकारचन्द्र श्रेष्ठले शेर्पालाई नगद १ लाख ५० हजारसहित सम्मान गर्नुभएको हो ।
शेर्पाको सम्मानमा केन्द्रले र्याली तथा नगर परिक्रमा गराएको थियो । रामशाहपथस्थित स्वास्थ्य मन्त्रालयदेखि कमलपोखरी, मैतीदेवी, गौशाला, एयरपोर्ट, कोटेश्वर हुँदै केन्द्रमा र्याली पुगेको थियो । त्यस्तै केन्द्रमा सम्मान कार्यक्रममा गरेर पुनः भक्तपुर दरबार स्क्वायर परिक्रमा गरेर र्याली केन्द्रमा पुगेको थियो ।
प्रत्यारोपण दूतमा नियुक्ति गरिनेछ : मन्त्री पौडेल
शेर्पालाई स्वास्थ्य मन्त्रालयले अङ्ग प्रत्यारोपण दूतका रूपमा नियुक्त गर्ने उद्घोष गर्नुभयो । सम्मान कार्यक्रममा बोल्नुहुँदै उहाँले शेर्पाजस्तो अदम्य साहस भएको व्यक्तिलाई मानव अङ्ग प्रत्यारोपण दूतका रूपमा नियुक्त गरिने बताउनुभएको हो । ‘पेम्बाजी अदम्य साहस भएको व्यक्ति हुनुहुँदो रहेछ । मिर्गौला प्रत्यारोपण गरेर पनि साहसका साथ सगरमाथा शिखर चुम्नुभयो । इतिहास बनाउनुभयो’, उहाँले भन्नुभयो, ‘उहाँलाई हामी प्रत्यारोपण दूत बनाउनेछौँ ।’
विशेषगरी ‘ब्रेन डेथ’ भएका व्यक्तिको अङ्ग अर्को व्यक्तिमा प्रत्यारोपण गर्ने बारे चेतना फैलाउनुपर्ने मन्त्री पौडेलको भनाइ थियो । उहाँले अङ्ग प्रत्यारोपणका लागि विद्यमान कानुनी व्यवस्थालाई सहज बनाउनुपर्ने पनि बताउनुभयो ।
अङ्ग प्रत्यारोपितहरू पनि अन्य सरह स्वस्थ हुन्छन् : डा. श्रेष्ठ
कार्यकारी निर्देशक डा. श्रेष्ठले मिर्गौला प्रत्यारोपितहरू पनि अन्य व्यक्ति सरह नै स्वस्थ हुनसक्ने बताउनुभयो । ‘पेम्बाजीले सगरमाथा चढेर आइसक्नुभयो’, उहाँले भन्नुभयो, ‘उहाँले उदाहरण देखाइसक्नुभएको छ ।’
सगरमाथा चढ्ने बेलामा शेर्पाले आफूहरूसँग पनि परामर्श लिनुभएको स्मरण गर्नुहुँदै डा. श्रेष्ठले आफूहरूले पनि सहर्ष हौसला दिएको बताउनुभयो । ‘प्रत्यारोपण गरेको करिब दुई वर्षमै ६११९ मिटर अग्लो लोबुचे चढ्नुभयो’, उहाँले भन्नुभयो, ‘हामीसँग पनि सल्लाह लिन आउनुभएको थियो । हामीले तपाईँलाई केही हुँदैन । अरू सरह नै हुनुहुन्छ, चढ्न सक्नुहुन्छ भनेका थियौँ ।’
अस्पताल र डाक्टर नभएको भए मेरो मृत्यु भएको ५ वर्ष भइसक्थ्यो : शेर्पा
शहीद धर्मभक्त राष्ट्रिय प्रत्यारोपण केन्द्र र डा. पुकारचन्द्र श्रेष्ठसहितका चिकित्सक नभएको भए आफ्नो मृत्यु हुनसक्ने पेम्बा शेर्पाले बताउनुभयो । कार्यक्रममा आफ्नो अनुभूति सुनाउने क्रममा उहाँले उपचार गर्ने अस्पताल र चिकित्सकका कारण आफू अहिलेको अवस्थामा रहेको बताउनुभयो । ‘अस्पताल र डाक्टर नभएको भए म मरेको पाँच वर्ष भइसक्थ्यो’, उहाँले भन्नुभयो ।
शेर्पाले आफू वैदेशिक रोजगारका क्रममा जापानमा रहँदा नै आफ्नो मिर्गौला खराब भएको बताउनुभयो । यद्यपि त्यतिखेर जानकारी नभएको उहाँको भनाइ थियो । परिवारसँगको लामो समयसम्मको बिछोडपछि नेपालमै उद्यमशील काममा लाग्न भनेर उहाँ फर्किने वेला अचानक स्वास्थ्य खराब भएको थियो ।
नेपाल आए लगत्तै परीक्षण गर्दा दुवै मिर्गौला खराब भइसकेको उहाँले बताउनुभयो । ‘यो मिर्गौला रोग भनेको के हो थाहा थिएन’, उहाँले भन्नुभयो, ‘एक्कासी नेपालमा आएर थाहा भयो । यो त मन्द विष जस्तो थाहै नपाई बिगार्ने रोग रै’छ ।’
तपाईँको अभिमत