मिर्गौला प्रत्यारोपण गरेर सगरमाथा शिखर चढ्ने पहिलो व्यक्ति बन्नुभयो पेम्बा शेर्पा, भन्नुहुन्छ— विश्वमा नेपालको नाम चिनाउन पाउँदा गर्व छ

सोलुखुम्बुका पेम्बा शेर्पा मिर्गौला प्रत्यारोपण गरेपछि विश्वको शिखर सगरमाथा चढ्ने पहिलो व्यक्ति बन्नुभएको छ । सफलतापूर्वक आरोहण गरी फर्किनुभएका उहाँलाई काठमाडौंमा स्वागत गरिएको छ ।

उहाँलाई स्वागत गर्न अर्का मिर्गौला प्रत्यारोपित झम्क श्रेष्ठलगायत त्रिभुवन अन्तर्राष्ट्रिय विमानस्थल पुग्नुभएको थियो ।

शेर्पाले बुधबार बिहान ९ बजेर ३० मिनेट जाँदा सगरमाथाको शिखरमा पाइला टेक्नुभएको थियो । उहाँ एक महिनाअघि नै सगरमाथाको आधार शिविरतर्फ प्रस्थान गर्नुभएको थियो । 

आफूलाई कुनै पनि स्वास्थ्य समस्या नभएको उहाँले बताउनुभयो । हेल्थपाटीसँगको टेलिफोन सम्पर्कमा अरू स्वस्थ व्यक्तिलाई लेक लाग्ने, स्वासप्रश्वास बढ्ने जस्ता समस्या भएपनि आफूलाई केही नभएको बताउनुभयो । ‘एउटा स्वस्थ मिर्गौला भएर पनि होला मलाई केही भएन’, उहाँले भन्नुभयो, ‘मिर्गौला प्रत्यारोपितहरूमध्ये पहिलोपटक विश्वको शिखर सगरमाथा चढ्न सफल भएँ, अत्यन्तै खुसी छु । मेरो ‘मिर्गौला प्रत्यारोपणपछि सगरमाथा आरोहण अभियान २०८१’ सफल भयो । प्रत्यक्ष अप्रत्यक्ष सहयोग गर्नुहुने सबैलाई धन्यवाद छ ।’

सगरमाथाको सफल आरोहणले गर्दा अन्य प्रत्यारोपितहरूलाई पनि मनोबल थपेको उहाँको बुझाइ छ । विमानस्थलमा स्वागत गर्न पुग्नुभएका झम्क श्रेष्ठले पनि अन्य मिर्गौला प्रत्यारोपण नगरिएको सामान्य व्यक्तिसरह नै मिर्गौला प्रत्यारोपित पनि सक्षम, स्वस्थ हुने सन्देश दिएको प्रतिक्रिया दिनुभयो ।

डा. पुकार मेरो भगवान्
शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक समेत रहनुभएका डा. पुकारचन्द्र श्रेष्ठसहितको टोलीले शेर्पाको मिर्गौला प्रत्यारोपण गरेको थियो । २०७९ कात्तिक २ गते शेर्पाको मिर्गौला प्रत्यारोपण गरिएको थियो । उहाँलाई बुवा (५६ वर्ष) ले मिर्गौला दान गर्नुभएको थियो । आफ्नो मिर्गौला प्रत्यारोपणको नेतृत्व गर्नुहुने डा. श्रेष्ठ मानवरुपी भगवान् भएको शेर्पा बताउनुहुन्छ । ‘हामी जस्ता मिर्गौला बिरामीको लागि उहाँ (डा. पुकार श्रेष्ठ) स्वर्गबाट भगवान् बनेर आउनुभएको हो’, उहाँले भन्नुभयो, ‘उहाँले कयौँलाई पुनर्जन्म दिनुभएको छ ।’

नेपालको नाम विश्वमा चिनाउन पाउँदा गर्व छ : शेर्पा
आरोही शेर्पाले नेपालको नाम विश्वसामु चिनाउन पाउँदा खुसी लागेको छ । हालसम्म कुनै पनि मिर्गौला प्रत्यारेपितले २५०० मिटरभन्दा माथिको टाकुरा चढ्न नसकेको भन्दै उहाँले गिनिज बुकमा नाम लेखाउन आवेदन दिइसकेको जानकारी दिनुभयो । ‘म नेपाललाई विश्वसामु चिनाउन चाहन्छु’, उहाँले भन्नुभयो, ‘मैले गिनिज बुकमा पनि नाम लेखाउन आवेदन दिइसकेँ । तीन महिना जति प्रक्रिया लाग्ने रहेछ ।’