औषधि उत्पादनलाई बढावा दिन राज्य तयार छ : डा. विश्वनाथ पौडेल

औषधि उद्योगीहरूले राज्यले आफूलाई आत्मनिर्भर हुने वातावरण सिर्जना नगरेको गुनासो गरेका छन् । चितवनको भरतपुरमा जारी आठौं  नेपाल फर्मा एक्स्पोको दोस्रो दिनमा आयोजित 'नेपालमा औषधि उत्पादनको सम्भावना र चुनौती' विषयक अन्तरक्रिया कार्यक्रममा औषधि उत्पादकहरूले आत्मनिर्भर बन्न सक्ने अवस्था हुदाहुँदै पनि राज्यले प्रोत्साहित नगरेको दुखेसो गरेका हुन् । 

नेपाल औषधि उत्पादक संघ (एपोन)ले एक्स्पोको आयोजना गरेको हो । अन्तरक्रिया कार्यक्रममा संघका पूर्वअध्यक्ष दिपकप्रसाद दाहालले राज्यले सहयोग गरे आफूहरूले नेपाली बजारमा माग भएकामध्ये ७५ प्रतिशत औषधिको उत्पादन गर्न सक्ने बताउनुभयो । 

उहाँले औषधि उत्पादनमा क्षमता वृद्धि भएपनि राज्यले नीति बनाएर कार्यान्वयन गर्न नसक्दा स्वदेशी औषधि उद्योगीहरू निराश भइरहेको बताउनुभयो । '२०६१ सालमा विदेशी औषधि कम्पनीको निरीक्षण पनि नगर्ने, दर्ता पनि नगर्ने भनेर राज्यले भनिसकेको छ तर उक्त निर्णय कार्यान्वयन भएन, धमाधम विदेशी कम्पनी दर्ता भइरहेका छन्,' उहाँले भन्नुभयो । 

कार्यक्रममा औषधि व्यवस्था विभागका प्रवक्ता सन्तोष केसीले समान राजनीतिक प्रतिवद्धता नहुँदा नीति कार्यान्वयमा समस्या भइरहेको स्पष्ट पार्नुभयो । उहाँले समायानुकुल विभागको संगठन संरचना नबनाइँदा कार्यान्वयमा असर पुगिरहेको बताउनुभयो । कार्यान्वयनका पाटोमा उद्योगीहरूसँग योजनासहित छलफल गर्न सरकार तयार रहेको उहाँको भनाइ छ । 

यस्तै संघका अर्का पूर्व अध्यक्ष जी नारायण क्षेत्रीले नेपालमा नेपाली औषधि र प्रविधिमा भएको विकास, औषधि क्षेत्रमा नेपालमा भएका उपलब्धिको चर्चा गर्दै राज्यले स्वदेशी उत्पादनलाई बढावा दिनेतर्फ ध्यान नदिएको बताउनुभयो । उद्योगीहरूले औषधि अनुसन्धानशालाको स्थापना हुनुपर्ने माग पनि गरेका छन् । 

योजना आयोगका उपाध्यक्ष डा.विश्वनाथ पौडेलले गुणस्तरयुक्त स्वदेशी औाषधि उत्पादन गर्नेतर्फ राज्य सकारात्मक रहेको बताउनुभयो । स्वदेशी उत्पादनलाई के कसरी बढाउन सकिन्छ विस्तृत अध्ययन गरी नीतिमा समावेश गर्न सकिन्छ भन्ने विषयमा छलफल गरी अगाडि बढ्न उहाँले उद्योगीहरूलाई आग्रह गर्नुभयो । 

एक्स्पो आइतबार (भोलि) सम्म चल्नेछ ।