कोरोना एन्टीबडी परीक्षणमा शिशुदेखि बृद्धसम्मलाई सहभागी गराइँदै

काठमाडौं । नेपालमा कोरोना भाइरसको संक्रमणको अवस्था पत्ता लगाउन देशभर गर्ने भनिएको एन्टीबडी परीक्षणको मापदण्ड संशाेधन गरिएको छ । एन्टीबडी परीक्षणका लागि जुनसुकै उमेरसमुहका व्यक्तिको नमुना (रगत) संकलन गरिने भनिएकोमा यसलाई संशाेधन गर्दै कम्तिमा ६ महिना उमेरका शिशुलाई पनि परीक्षणमा सहभागी गराइनेगरि नयाँ मापदण्ड बनाइएको छ ।

विश्व स्वास्थ्य संगठन(डब्ल्यूएचओ)को प्राविधिक सहयोगमा ईपिडिमियोलोजि तथा रोग नियन्त्रण महाशाखा र राष्ट्रिय जनस्वास्थ्य प्रयोगशालाको समन्वयमा काठमाडौं उपत्यका सहित देशभर एकैसाथ एन्टीबडी परीक्षण गरिने र यसबाट नेपालको संक्रमणको स्थिति पत्ता लाग्ने जानकारी दिनुभयो । 

यो परीक्षणबाट नेपालमा कति संक्रमित भए भन्ने तथ्य एकीन हुने बताउँदै उहाँले डब्ल्यूएचओको प्राविधिक कारणले एन्टीबडी परीक्षणमा ढिलाई भएको बताउनुभयो । उहाँले समुदायमा गरिने परीक्षण (सेरो प्रिभिलेन्स) अध्ययन सुरु भएको २ हप्ताभित्र सक्ने जानकारी दिनुभयो । यसअघि भदौको अन्त्यसम्ममा परीक्षण सुरु गरिने भनिएको थियो । 

ईडिसिडिका जनस्वास्थ्य अधिकृत रामकुमार महतोका अनुसार परीक्षणमा ६ महिने शिशुलाई पनि सहभागी गराइनेछ । यस्तै यसअघि बाहिरबाट नेपालआई स्थानियस्तरमा ४ हप्ता बसेको व्यक्तिको पनि नमुना संकलन गरिनेछ ।

यसअघि इम्यूनोग्लोबिन टेस्ट गर्न स्थानिय स्तरमा ६ हप्ता बसेको हुनुपर्ने सर्त राखिएको थियो । तर इम्यूनोग्लोबिन टेस्टको लागि किट नपाएकाले शरीरको एन्टीबडी परीक्षण गर्न ४ हप्ताको समय तय गरि रिभ्यू बोर्डमा पठाइएको महतोले जानकारी दिनुभयो । 

यस परीक्षण सातै वटा प्रदेशमा प्रत्येक प्रदेशको ३० वटा वडामा परीक्षण गरिनेछ । जहाँ प्रत्येक वडाका १५ परिवारको परीक्षण गरिनेछ । प्रतिपरिवार १ जनाको नमुना संकलन गरिनेछ । नमुना संकलन गर्दा टाउको छानेर नभई वैज्ञानिक आधारमा कम्प्युटराइज मार्फत गरिने महतोले बताउनुभयो । 

उहाँले भन्नुभयो, “यो परीक्षण आमालाई गर्ने, वुवालाई या छोराछोरी भन्ने हुँदैन । हामीले उमेरअनुसार कम्युटरमा रेकर्ड राख्छौँ र किस्ट ग्रिटका आधारमा कम्युटरले नै नम्वर छान्छ । सोही नम्वर अनुसार व्यक्तिको नमुना लिइनेछ । यसरी गर्दा ६ महिनाको बालक पनि हुन सक्छ, ६० वर्षकाे वृद्द पनि हुन सक्छ । ” एक प्रदेशमा ४५० नमुना संकलन गरि देशभर ३ हजार १५० जनाको नमुना लिइनेछ । 

एन्टीबडी परीक्षण किन ?
ईडिसिडिका अनुसार यो परीक्षण गरेपछि हालसम्म नेपालमा कति प्रतिशत व्यक्ति संक्रमित भए भन्ने पत्ता लाग्छ । विश्व स्वास्थ्य सगंठनले हाल नेपालको संक्रमणको समुहमा रहेको बताउँदै आएको छ तर यो सर्वेबाट एकिन अवस्था पत्ता लाग्नेछ ।

यो परीक्षणबाट शरीरमा कोरोना भाइरस संक्रमण भइसकेको भए त्यसविरुद्ध शरीरले उत्पादन गरेको भाइरस प्रतिरोधी प्रोटिन भए / नभएको पत्ता लाग्छ । 

मानौ, सर्वेबाट संक्रमणदर ५० प्रतिशतभन्दा मुनि देखियो भने हामीले संक्रमण उच्च बिन्दुमा पुग्नै बाँकी छ भनेर बुझ्नुपर्छ र सोही अनुसार तयारी गर्नुपर्नेछ भने ५० प्रतिशतभन्दा बढी देखिए महामारी उच्च बिन्दुमा गइसकेको छ, अब क्रमिक रुपमा घट्नेछ भनेर सोच्नुपर्दछ ।

त्यसैले महामारीको अवस्था पत्ता लगाएर महामारी राेकथाम तथा नियन्त्रण गर्ने रणनीति बनाउन समुदायमा परीक्षण (सेरो प्रिभिलेन्स अध्ययन) महत्वपूर्ण छ । 

सर्वेक्षणमा काठमाडौंबाट एक सुपरभाइजर तथा स्थानिय स्वास्थ्य संयोजक र ल्याबका तालिमप्राप्त व्यक्ति गरि ३ जनाको टोली             खटिनेछ ।