गर्मी मौसममा छालासम्बन्धी कस्ता रोगको जोखिम हुन्छन् ?, कसरी बच्ने ? (भिडियो)

गर्मी मौसममा विभिन्न किसिमका स्वास्थ्य समस्या आउन सक्छन् । यससँगै छालासँग सम्बन्धित रोगहरू पनि बढी देखिन सक्छन् ।

निजामति कर्मचारी (सिभिल) अस्पतालमा कार्यरत छाला, यौन तथा सौन्दर्य विशेषज्ञ डा. रविन्द्र शर्माका अनुसार गर्मी मौसममा दाद, ब्याक्टेरिया इन्फेक्सन, चायाँ, पोतो आदि समस्या बढी हुने गर्छ । त्यस्तै घामका कारण एलर्जी पनि बढ्ने हुन्छ । 

‘जाडो मौसममा पूरा बाहुला भएको तथा ज्याकेट जस्ता लुगा लगाउने चलन हुन्छ । त्यसले गर्दा छालाको सुरक्षा हुन्छ’, डा. शर्मा भन्नुहुन्छ, ‘गर्मी मौसममा त्यस्तो लुगा लगाइदैन । त्यसले गर्दा विभिन्न किसिमका छालाका समस्या हुन सक्छन् ।’

कसरी बच्ने ?
गर्मी मौसममा जाडो मौसममा जस्तो पूरा बाहुला भएको लुगा लगाउन असहज हुन्छ । त्यसैले पातलो तर पूरा बाहुला भएको वा शरीरको छाला ढाक्ने लुगा लगाउन डा. शर्मा सुझाउनुहुन्छ । त्यस्तै छाताको प्रयोग गर्ने तथा ह्याटको प्रयोग गर्ने गर्नाले घामको एलर्जीबाट बच्न सकिने उहाँको भनाइ छ ।

सन्स स्क्रीन र मोस्चराइजरको मात्रा बढाएर बाहिर निस्कँदा राम्रो हुन्छ । दिउँसोको समयमा काम गर्दा सकेसम्म छायाँमा रहेर काम गर्नुपर्छ ।