आठौं नेपाल फर्मा एक्स्पो भाेलिदेखि, १६१ वटा स्टल रहने

नेपाल औषधि उत्पादक संघ (एपोन)ले गर्न लागेको ‘आठौं नेपाल फर्मा एक्स्पो (२०२२’ को लागि सबै स्टल बुक भएको छ । तयारी अन्तिम चरणमा पुगेको र स्टल बनाउने तथा सजाउने काम चलिरहेको छ । एक्स्पोमा १६१ वटा स्टल रहने छन् । 

२५ वटा स्वदेशी र बाँकी विदेशी औषधि कम्पनिको स्टल रहनेछन् । भारत, चीन, बंगालादेश लगायतका विदेशी औषधि उद्योगीहरुले स्टलमा सहभागी जनाउनेछन् । 

चितवनको भरतपुरमा चितवन एक्स्पो सेन्टरमा हुन लागेको एक्स्पोको अन्तिम तयारी पूरा भइसकेको एक्स्पोका मिडिया संयोजक तथा एपोनका उपाध्यक्ष सन्तोष बरालले जानकारी दिनुभयो । उहाँका अनुसार राष्ट्रपति विद्यादेवी भण्डारीले एक्स्पोको उदघाट्न गर्ने तय भएको र स्वास्थ्यमन्त्री र उद्योगमन्त्रीले एक्स्पोको अवलोकन गर्ने कार्यक्रम तय भएको छ । 

वैशाख ९ गते दिउँसो एक बजे राष्ट्रपति विद्यादेवी भण्डारी एक्स्पोको उद्घाटन हुने कार्यक्रम रहेको छ । एक्स्पो तीन दिनसम्म चल्ने एक्स्पोको १५ हजारभन्दा बढीले अवलोकन गर्ने अनुमान गरिएको छ ।

डाक्टर, पारामेडिक्स,फर्मा एसिस्ट, स्वास्थ्यकर्मी लगायत औषधि क्षेत्रमा रुची राख्ने व्यक्तिहरुले एक्स्पोको अवलोकन गर्ने लक्ष्य लिइएको छ । एपोनले नेपालमा उत्पादन हुँदै आएका औषधि र औषधि उत्पादनमा प्रयोग हुने प्रविधि, औजार, विभिन्न किसिमका मेसिन, कच्चापदार्थ, प्याकेजिङ लगायतमा भएका विकास र उपलब्धिहरुको प्रदर्शनी प्रत्येक दुई बर्षमा गर्दै आएको छ ।