रुसले नेपाललाई कोरोनाको खोप दिने, विभाग भन्छ प्रक्रिया नै सुरु भएको छैन
हेल्थपाटी - आश्विन १३, २०७७ १९:५४ मा प्रकाशित
अ +
अ -
काठमाडौं । रुसले बनाएको कोरोना विरुद्धको खोप ‘स्पुतनिक भी’ नेपाल ल्याउने सम्झौता भएको छ। रुसको दि रसियन डिरेक्ट इन्भेष्टमेन्ट फण्ड (आरडीआइएफ)ले विज्ञप्ति निकालेर नेपालको ट्रिनिटी फर्मास्युटिकल्ससँग २ करोड ५० लाख डोज कोरोनाबिरुद्धको भ्याक्सिन ‘स्पुतनिक भी’ दिने सम्झौता गरेको जानकारी दिएको छ ।
नेपालको करीब ९० प्रतिशत जनसंख्यालाई उक्त कोरोनाबिरुद्ध भ्याक्सिन पुग्नेछ भने नेपालका क्लिनिकहरुमा समेत सहज रुपमा उपलब्ध गराइने बताइएको छ । यो खोप ७५ अन्तर्राष्ट्रिय स्तरमा वैज्ञानिक पब्लिकेसनहरुले प्रमाणित गरेको र २५० क्लिनिकहरुमा समेत परीक्षण भइसकेको दाबी उक्त विज्ञप्तिमा उल्लेख गरिएको छ ।
‘स्पुतनिक भी’लाई गामालेया राष्ट्रिय रिसर्च इन्स्टिच्युट अफ ईपिडिमियोलोजी र माइक्रो बायोलोजीले रुसको स्वास्थ्य मन्त्रालयमा दर्ता गरेका थिए । रुसले आफूले विश्वमै कोरोना विरुद्धको पहिलो खोप बनाएकाे दाबी गर्दै आएकाे छ ।
एसियाका करीब ५० देश, मध्यपूर्व, ल्याटिन अमेरिका, युरोप र सीआइएसले स्पुतनिक भीका लागि आवेदन दिएको आरडीआइएफले विज्ञप्तिमा जनाएको छ । आरडीआइएफका कार्यकारी निर्देशक किरिल दिमित्रिभले भने, ‘नेपालको ९० प्रतिशत जनसंख्यालाई स्पुतनिक भी पुर्याउने ट्रिनिटी फर्मास्यूटिकललाई धन्यवाद दिनुभएको छ । राष्ट्रपति भ्लादिमिर पुटिनकी छोरीलाई परीक्षण गरि सर्वसाधरणमाझ पुर्याइएको थियो । खोपको तेस्रो चरणको परीक्षण भइरहेको छ ।
प्रक्रिया नै सुरु भएको छैन
नेपालमा कोरोना विरुद्धको खोप ल्याउने चर्चा चलिरहँदा औषधि व्यवस्था विभागले भने आफूलाई यसबारे अहिलेसम्म कुनै जानकारी नआएको बताएको छ । विभागका महानिर्देशक नारायणप्रसाद ढकालले कोरोना विरुद्धको खोप आयात गर्ने सम्बन्धमा कुनै निवेदन नपरेको जानकारी दिनुभयो ।
उहाँले खोप आयातका लागि धेरै प्रक्रिया पूरा गर्नपर्ने भएकाले तत्काल खोप आउन नसक्ने बताउनुभयो । स्वास्थ्य अनुसन्धान परिषद्सँगको स्विकृति, खोप ऐन तथा अत्याधुनिक खोप भण्डारण(कोल्ड चेन) लगायतका थुप्रै प्रक्रिया र मापदण्ड पूरा गर्नुपर्ने भएकाले खोप आउन केही समय लाग्ने ढकालले हेल्थपाटीलाई जानकारी दिनुभयो ।
तपाईँको अभिमत