अब कुनै अस्पतालमा डाक्टर नहुन पनि सक्छ : स्वास्थ्यमन्त्री पौडेल

स्वास्थ्य तथा जनसङ्ख्या मन्त्री प्रदिप पौडेलले अस्पतालमा डाक्टर नहुनसक्ने अवस्था सिर्जना हुने बताउन्ुभयो । विशिष्टिकृत निरोधात्मक अस्पताल निर्माण गरेर त्यहाँ जनस्वास्थ्य अधिकृतले जनचेतना अभिवृद्धि गर्ने कार्य मात्र गर्ने अवस्था हुनसक्ने उहाँ बताउनुभएको हो ।

शनिबार स्वास्थ्य पत्रकार मञ्च नेपालको छैठौँ राष्ट्रिय अधिवेशन तथा १०औँ वार्षिक साधारणसभाको उद्घाटन कार्यक्रममा यस्तो बताउनुभएको हो ।

‘अब कुनै अस्पतालमा डाक्टर नहुन पनि सक्छ’, उहाँले भन्नुभयो, ‘जनस्वास्थ्य अधिकृत राखेर निरोधात्मक क्षेत्रमा चेतना अभिवृद्धि गर्ने काम गर्नुपर्ने अवस्था छ ।’ उहाँले कुनै रोगको निरोधात्मक खोप कहिले आउँछ, कसरी लगाउने, केमा दिइँदैछ जस्ता कुरा उक्त विशिष्टिकृत अस्पतालले जानकारी गराउनुपर्ने जनाउनुभयो ।

‘अशुद्ध’ खाद्यपदार्थ तथा जीवनशैलीले रोग बढेकाले जनचेतना मात्र दिने विशिष्टिकृत अस्पतालको खाँचो भएको उहाँको भनाइ छ ।

‘यसरी नै अशुद्ध खानेकुरा, खानेपानी बढ्दै जाने हो भने बिरामीको सङ्ख्या बढ्दै जान्छ । चेतना अभिवृद्धि नगर्ने हो भने बिरामीको सङ्ख्या बढ्दै जान्छ’, उहाँले भन्नुभयो, ‘त्यस्ता खानेकुरालाई निरुत्साहित गर्ने व्यवस्था गरौँ ।’

समाजवाद स्वास्थ्यमा लागू हुनुपर्छ
यसैबीच मन्त्री पौडेलले समाजवाद स्वास्थ्य लागू हुनुपर्ने बताउनुभयो । समाजवाद दस्तावेज र भाषण गर्ने शब्द मात्र नभएर अनुभूतिमा बदल्ने विषय भएको उहाँको भनाइ छ ।

‘समाजवाद खास स्वास्थ्यमा लागू हुनुपर्छ’, उहाँले भन्नुभयो, ‘दस्तावेज र भाषणमा मात्र बोल्ने शब्द होइन यो । यो त अनुभूतिमा बदल्ने विषय हो ।’ उहाँले स्वास्थ्यमा समाजवाद ल्याउन बीमालाई व्यवस्थित गर्न जरुरीभएको बताउनुभयो ।

मन्त्री पौडेलले बीमाको स्रोत सुनिश्चित गर्नुपर्ने बताउनुभयो । त्यसका लागि योगदानमा आधारित बीमा कार्यक्रम गर्ने तथा अन्य स्रोतहरू खोज्न सकिने भन्नुभयो ।