नेपालमा मुटु रोगीको संख्या ५ गुणाले वृद्धि, मुटुलाई माया गर्न डाक्टरको सुझाव

आज विश्व मुटु दिवस विभिन्न कार्यक्रम गरी मनाईंदैछ । हरेक वर्षको सेप्टेम्बर २९ तारिखलाई विश्व मुटु दिवसका रुपमा मनाउने गरिएको छ । यो वर्षको विश्व मुटु दिवसको नारा ‘युज हर्ट टु कनेक्टु’  भन्ने रहेको छ ।

नेपालमा पछिल्लो समय अस्वस्थ तथा असन्तुलित खानपान, विलासी जीवन र लापरबाहीका कारण मुटु रोगका बिरामी बढ्दै गएका छन् । नेपालमा २५ प्रतिशत अर्थात झण्डै ७५ लाख नागरिक कुनै न कुनै प्रकारका मुटुरोगबाट पीडित रहेका सरकारी तथ्याङ्क छ । मुटु रोगीको संख्या नेपालमा १० वर्षयता ५ गुणाले बढेको छ  ।
वरिष्ठ मुटुरोग विशेषज्ञ डा.प्रकाशराज रेग्मीले खानपान र जीवनशैलीमा ध्यान दिएर वर्षमा एक पटक भए पनि स्वास्थ्य परीक्षण गरे मुटु रोगबाट बच्न सकिने बताउनुभयो । उहाँले
 मुटुरोगबाट बच्न केही सुझाव दिनुभएको छ । 
- चुरोट, सुर्ती खानै हुन्न । खानेको नजिकमा बस्न पनि हुन्न । 
- जाँड, रक्सी पिउनु हुन्न । धेरै पिउनेको संगत पनि गर्नु हुन्न ।
- दिनदिनै ३० मिनेट हिंड्ने र व्यायाम गर्नुपर्छ । दैनिक व्यायाम गर्नेहरूलाई साथी बनाउनु पर्छ । 
- खाना खाँदा हरियो रंगको धेरै र सेतो रंगको थोरै मात्र खानुपर्छ । खुर्सानी मन पर्नेले मज्जाले खाए हुन्छ । हरियो सलाद, हरियो तरकारी, फलफुल पचाउन सकिने जति खानु पर्छ । गेडागुडीको दाल दिनदिनै खानु पर्छ । चामल, मैदा, पिठो, आलु कम खानु पर्छ । कागती, करेला, साग, हरियो तरकारी, गेडागुडी र फलफुल साथी खाना हुन् । 
- तयारी चाउचाउ, पाकेटको दालमोठ, आलुचिप्स, कोक, फान्टा आदि शत्रु खाना हुन् । साथी खाना बढाउनु पर्छ, शत्रु खाना घटाउनु पर्छ । 
- सम्पत्ति मात्र भएर सुखी भइदैन । सुखी बन्न आत्मसन्तुष्टि चाहिन्छ । दुःखीलाई सहायता गरे आत्मसन्तुष्टि मिल्छ । 
- दान दिने गरेमा सुख, सन्तुष्टि, पुण्य सबै मिल्छ । तृष्णा तनावको कारण हो । तनावले रोग निम्त्याउँछ । जे छ त्यसैमा रमाउने बानी बसाल्यो भने तनाव पनि हुँदैन, रोग पनि लाग्दैन ।