तेस्रो लहर : कोभिड अस्पतालहरुको सूचिकृत गरि अनुगमन गर्न गृहको निर्देशन

गृह मन्त्रालयले कोरोना भाइरस संक्रमणको सम्भावित तेस्रो लहरलाई मध्यनजर गर्दै ७७ वटै जिल्लाका स्वास्थ्य संस्थाहरुलाई कोरोनाको उपचारका लागि सूचिकृत गर्न प्रशासन कार्यालयहरुलाई निर्देशन दिएको छ ।  

स्वास्थ्य तथा जनसंख्या मन्त्रालय, स्वास्थ्य आपतकालीन तथा विपद व्यवस्थापन इकाई, स्वास्थ्य आपतकालीन कार्यसंचालन केन्द्रको अनुरोधमा गृहले अस्पताहरुलाई सूचीकृत गर्न प्रमुख जिल्ला अधिकारीहरुलाई भनेको हो । 

हाल संक्रमितहरुको संख्या दिनप्रतिदिन बढ्दै गइरहेको तथा अस्पतालमा बेडहरु भरिदै गइरहेको अवस्थाले अस्पताललाई सूचीकृत गर्नुपर्ने आवश्यकता देखिएको भन्दै गृहले आइसोसेलन सेन्टर, सवै अस्पतालहरु, मेडिकल कलेजहरुमा आवश्यक व्यवस्थापन गर्न प्रमुख जिल्ला अधिकारीलाई भनेको छ । 

कोभिड–१९ को दोस्रो लहरमा एक्कासी बढेको संक्रमितको संख्याले स्वास्थ्य क्षेत्रलाई अस्त–व्यस्त बनाउदा सवैको मेहनत र प्रयासले अवस्था काबुभित्र राख्न सकिएको, प्रथम र दोस्रो लहरको बेलामा सुचीकृत अस्पतालहरु हाल स्थगन गरिएको हुँदा सम्भावित तेस्रो लहरको सम्भावानालाई मध्येनजर गर्दै तयारीमा रहन गृहले निर्देशन दिएको जनाएको छ ।  

आवश्यकताको आधारमा आइसोलेसन सेन्टर, अस्पतालहरु र मेडिकल कलेजहरु सूचीकृत गर्ने , अस्पतालहरुको सूची स्वास्थ्य तथा जनसंख्या मन्त्रालयको स्वास्थ्य आपतकालीन कार्य सञ्चालन केन्द्रमा पठाउन, सूचीकृत अस्पतालहरुमा संक्रमितहरुको तथ्यांक÷विवरण दैनिक अध्यावधिक गर्न लगाउन, मासिक अत्यावधिक विवरण एकिन गरी सो अनुसार निशुल्क उपचार भएका संक्रमितहरुको विवरण सम्बन्धित अस्पतालहरुलाई सोधभर्नालाई स्वास्थ्य मन्त्रालयलाई पठाउन तथा सूचीकृत अस्पतालहरुको नियमित सुपरिवेक्षण अनुगमन गर्न प्रमुख जिल्ला अधिकारीहरुलाई गृहले निर्देशन दिएको छ ।