कांग्रेस नेता प्रदीप गिरिको स्वास्थ्यबारे उपचारमा संलग्न डाक्टर के भन्नुहुन्छ ?

नेपाली कांग्रेसका नेता तथा प्रतिनिधिसभा सांसद प्रदीप गिरि गम्भीर बिरामी पर्नुभएको छ ।गिरिको ललितपुरस्थित मेडिसिटी अस्पतालमा उपचार भइरहेको छ । 

गिरिको उपचारमा संलग्न एक चिकित्सकका अनुसार अवस्था गम्भीर भएपनि बाहिर हल्ला गरेजस्तो अति गम्भीर होइन। उहाँलाई क्यान्सर निमोनियासहित अन्य केही स्वास्थ्य समस्या देखिएको छ।

सामान्य भेन्टिलेटर सपोर्ट(नन इन्भ्याजिभ)को सहायतामा गिरिको उपचार भइरहेको ती चिकत्सकले हेल्थपाटीलाई जानकारी दिनुभयो । नन इन्भ्याजिभ भेनिटलेटर सपोर्ट भनेको शरीरभित्र पाइप छिराएर अक्सिजन दिने खालको नभई बाहिरीरुपमा मास्कको माध्यमबाट अक्सिजन सपोर्ट दिइने प्रक्रिया हो । 

अहिले बिहानसम्मको रक्तचाप लगायत अन्य परीक्षणको अवस्था सामान्य रहेको ती चिकित्सकले बताउनुभयो । उपचार भइरहँदा मृत्यु भएको भनी सामाजिक सञ्जालमा गलत हल्ला फैलिएको उहाँको भनाइ छ। 

पारिवारिक स्रोतकाअनुसार गिरिले बोल्न छाड्नुभएको २ दिन भएको छ । भारतमा उपचार गरेर साउन पहिलो साता नेपाल फर्किएपछि उहाँलाई निमोनिया भएको थियो । निमोनियासहित बिरामी परेपछि साउन दोस्रो साता अस्पताल भर्ना गरिएको थियो।