१०० बुँदे सुधार कार्यसूची कार्यान्वयनमै मन्त्रालयको ध्यान : मन्त्री मेहेता

काठमाडौं । स्वास्थ्य तथा खाद्य स्वच्छता मन्त्री निशा मेहेताले आफू पदबाट बिदा हुने सम्बन्धमा सार्वजनिक रूपमा भइरहेको चर्चाप्रति प्रतिक्रिया जनाउँदै यस विषयमा कुनै पनि आधिकारिक जानकारी प्राप्त नभएको स्पष्ट पार्नुभएको छ।

आइतबार मन्त्रालयमा स्वास्थ्य पत्रकारहरूसँग आयोजित सुझाव संकलन तथा अन्तरक्रिया कार्यक्रममा बोल्दै मन्त्री मेहेताले सञ्चारमाध्यममा विभिन्न समाचारहरू प्रकाशित भए पनि सम्बन्धित निकायबाट औपचारिक रूपमा कुनै जानकारी नआएको बताउनुभयो।

उहाँले वर्तमानमा मन्त्रालय सरकारको १०० बुँदे शासकीय सुधार कार्यसूची कार्यान्वयनमा केन्द्रित रहेको उल्लेख गर्दै स्वास्थ्य सेवा सुधार, सुशासन प्रवर्द्धन तथा सेवा प्रवाहलाई थप प्रभावकारी बनाउने दिशामा काम भइरहेको जानकारी दिनुभयो।

मन्त्री मेहेताका अनुसार मन्त्रालयभित्र सुधार आवश्यक रहेका क्षेत्रहरूको पहिचान गरी योजनाबद्ध रूपमा सुधारका कार्यक्रम अघि बढाइएका छन्। ती कार्यक्रमलाई परिणाममुखी बनाउँदै स्वास्थ्य प्रणालीलाई थप व्यवस्थित र उत्तरदायी बनाउने प्रयास जारी रहेको उहाँले बताउनुभयो।

उहाँले मन्त्रालयका गतिविधि, चुनौती तथा सुधारका प्रयासबारे सञ्चारमाध्यमसँग नियमित संवाद आवश्यक रहेको उल्लेख गर्दै आगामी दिनमा यस्ता अन्तरक्रिया कार्यक्रमलाई निरन्तरता दिइने जानकारी दिनुभयो।

कार्यक्रममा सहभागी स्वास्थ्य पत्रकारहरूले स्वास्थ्य बीमा कार्यक्रम, औषधि आपूर्ति तथा व्यवस्थापन, अस्पताल सुधार र स्वास्थ्य सेवाको गुणस्तर अभिवृद्धिलगायत विषयमा आफ्ना सुझाव प्रस्तुत गरेका थिए।

उक्त अवसरमा मन्त्रालयका सचिव डा. विकास देवकोटाले स्वास्थ्य क्षेत्रको दीर्घकालीन सुधारका लागि नीतिगत तथा संरचनागत पहलहरू अघि बढाइएको जानकारी दिनुभयो। अस्पताल व्यवस्थापन सुधार, औषधि व्यवस्थापन प्रणाली सुदृढीकरण तथा स्वास्थ्य सेवाको गुणस्तर वृद्धि मन्त्रालयका प्रमुख प्राथमिकतामा रहेको उहाँले बताउनुभयो।

सचिव देवकोटाले स्वास्थ्य क्षेत्रका विद्यमान चुनौती समाधान गर्न आवश्यक कानुनी, नीतिगत तथा संस्थागत सुधारलाई समेत प्राथमिकताका साथ अघि बढाइएको उल्लेख गर्नुभयो। आगामी आर्थिक वर्षदेखि सुधारका कार्यक्रमहरूको कार्यान्वयनलाई थप प्रभावकारी र परिणाममुखी बनाइने उहाँको भनाइ थियो।