मानसिक अस्पताल लगनखेलको किशोरकिशोरी मानसिक स्वास्थ्य इकाई उद्घाटन, मुलुकमै पहिलो रहेको दाबी

मानसिक अस्पताल लगनखेलमा किशोरकिशोरी मानसिक स्वास्थ्य इकाई स्थापना भएको छ । सो इकाईको बिहीबार स्वास्थ्य तथा जनसंख्या मन्त्री मोहनबहादुर बस्नेतले उद्घाटन गर्नुभयो ।

इकाई मानसिक अस्पताल लगनखेल र बालअधिकारमुखी संस्था सिविन–नेपालको सहकार्यमा स्थापना गरिएको हो । 

मानसिक रोग ठूलो चुनौति बनेको भन्नुहुँदै मन्त्री बस्नेतले इकाई स्थापनाले रोग न्यूनिकरणमा टेवा पुग्ने बताउनुभयो । उहाँले यस्तो इकाई कम्तिमा सात प्रदेशमा विस्तार गर्न जरुरी रहेको र त्यसमा आफूले पहल गर्ने प्रतिवद्धता व्यक्त गर्नुभयो । 'किशोरोकिशोरी मानसिक स्वास्थ्य युनिट बनेको छ, यसको प्रशंसा गर्दछु', मन्त्री बस्नेतले भन्नुभयो, 'कम्तिमा सात प्रदेशमा यसको सेवा विस्तार गर्नुपर्छ । यसमा म पहल गर्नेछु ।'

इकाईमा बहिरंग तथा अन्तरंग सेवा उपलब्ध रहेको निर्देशक डा. अनन्तप्रसाद अधिकारीले जानकारी दिनुभयो । उहाँका अनुसार मानसिक अस्पताल लगनखेल किशोरकिशोरी मानसिक स्वास्थ्यमा बहिरंग सेवा प्रदान गर्ने नेपालमै पहिलो भएको छ । नेपालमा दैनिक २० जनाले आत्महत्या गरिरहेको तथ्याङ्क उल्लेख गर्दै उहाँले यस्तो इकाईले त्यसलाई न्यूनिकरण गर्न मद्दत पुग्ने बताउनुभयो ।

नेपालमा १० देखि १५ प्रतिशत बालबालिकालाई केही न केही मानसिक समस्या रहेको अनुमान गरिएको छ । 

इकाईमा हाल डा. अरुणराज कुँवरको नेतृत्वमा किशोरकिशोरी मनोचिकित्सक, मनोचिकित्सक, चिकित्सा मनोविद्लगायत ३० जना कार्यरत रहेका छन् ।